Assinoonni hasaawanna loonsoonni looso maxaafunni attammisiinse shiqisha dagganno ilamara dancha rosicho worate yino sidaamu qoqqowi qaru gashshaanchi kalaa Desti Ledamohu. Qaru gashshaanchi Xaphoomu ministrchi dokter Abiy Ahimedihu sa’u yannara assino hasaawanna loosino looso amidinohu ‘’ASHAARA’’ yaamamino maxaafi Itophiyu Pireesete Uurrinshanni attamame fulasi harunse maxaafu aana noosi hedo xawisino.
Pirezidantichu baxxinohunni Bakkalcho Gaazeexi ledo assino hasaawinni; xaphoomu ministrchi dr Abiy Ahimedihu sa’u sase dirra giddo assino hasaawanna loosino looso maxaafunni attamisiinse fushsha dagganno ilamara rosicho worate yino. Aja dume coyi’noonnita loosunni leellinshanni woyte gobba hiittoonni kakkaooshshunninna cincatenni massanganniro buuxxanno yee hedeemmo yino.
Kalaa Desti ledotenni buximatenni fulate diinaho reqecci yinoommo ikkitonni seejjamme, mittimmanke kaajjishi’ne hara dandiinummoro di siyatammeemmo; ‘’giddonke badooshshu nafa hee’riro gutu hedo amande badooshshe ajinshe sharrammo’’ yitanno hedo amadinoha ikkasinni maxaafu lowo egenno aannoha ikkasi xawisino.
Maxaafu xaphoomu ministrchi gobba geisatenna mittimma leellishate, buximatenni fushshe jireenyunniwa iillishate hedo haa’re dayinotanna dimokraase halashshate, hedo xawisate qoossonna miidiyu wolapho agarsiisate adhino qaafo leellishanno garinni borreessaminota la’’a dandoommo yino.
Hattono bayiriidi hiddaasete kofattonna sukkaarete faabrika lede hanafante gobbate jiro gawajjite mereeroho uurite gattino pirojektuwa tittirshunni la’’e tiro aanna gumulantanna la’nanni hee’noonni yinohu kalaa Desti; ko garinni sunfummoha ikkiro gobbanke harancho yanna giddo sagale huucci’ratenni fulte umose dandiitannotinna woloota kaa’litannoti di huluullissannote yaanni hedosi worino.
Itophiyu Pireesete Uurrinshano togooha dhaggete losso loosse ilamate maareekkansanni galatama hasiissannonsa yino.
Jeefoteno qoqqowu gashshaanchi xaa yannara babbaxxitinoti gobboomu pirojektuwa gumulante maassantanni leellansa ledo amadaminohunni kaino xa’mora dawaranni, ‘’Gobbate loonseemmo looso doorshaho yine di loonseemmo; loonseemmohu gobbankera yineeti; doorammeemmohuno loonseemmohuraati’’ yaanni coyi’rino.
Qiddist Gezaheny
Ella 3 , 2013 M.D
