Addis Ababa:- Sidaamu buni lekkate kowaase kilawe Siyyumi kabbadiha qajeelshaanchimmatenni mootoonsitinohu albiha Wondimmaagenyi Teshoomeha geegiissatenniiti.
Qajeelshaanchu Siyyummi Kabbadihu, qajeelshaanchimmatenni owaante uyno kilabba mereerinni Addis Ababu kanami, Faasili Kanami, hattono baara wido Yemenete gobboomu kilawe qajeelshatenni luphiima gade afi’rinoha ikkasinni 2015 Betikinge pirimiyeere liigera Sidaamu Buni lekkate kowaase gaamo danchu gumira fushshanno yine hexxo tungoonni.
Kilawe haaru qajeelshaanchira biiloonye uytinohu, tayxe Betiking Pirimeere Liigera mootonsinoonnihu Wondimmaagenyi Teshoomehu sase godo`le harise mitte godo`lera calla taalo fule lame godo`lera haammata eo kilawete e`eenna qeelamara dandiino daafiraati tenne qaafo adhinoonni yinoonni.
Haaru qajeelshaanchi Siyyumi Kabbadihu kilawete ledo lamu diri kontraati sheemaate einotano mashalaqqe buuxissanno.
Abrahaam Saamueel
Birra 10, 2015 M.D Hamuse
