Addis Ababa:- 15ki baandeeru barra “Baandeerinke Batinyimmanke xawishsha; Wolambinatinke Heellichooti” yaanno massagote qaalinni Sidaamu qoqqowira Hawaasa ayirrinsoonni.
Tenne yannara basete leelle sokkasi sayisinohu Sidaamu qoqqowi pirezidaantichi kalaa Desta Ledamo; “Baandeerinke gobbanke ayirrinyinna wolambinatinke xawishshaati” yaatenni baandeeru ayirrinyira mundeensanna miqichonsa kakkaltino baalira ayirrinyu hasiisannonsa yiino.
Baandeeru dhagge ilamate ragunni rosiisa hasiissanno yiinohu kalaa Desta; baandeeru barra ayirrisa gobboomu batinyimmanke kaajjishate,wolambinatinke ayirrara,hattono roorenkanni gobboomu baqqeenya kalaqate jawa tiro nooho yiino.
Ledoteno kalaa Desta, gobbate ayirrinyiranna horora baalinke qansichimmanke bikkinni qeechanke fula hasiissannonke yaanni sokkasi sayisino.
Qoqqowu songaafitte baabba Faantaye Kebbedeti ise widoonni, Baandeeru ayyaana mundeete waaga baatatenni ayirrinsanni gede dandiissinorira ayirrinyu hasiisannota xawisse;kuni duuchanka woyite qaanganni Baandeeru ayyaani Itophiyimmanke xawishsha qaanganniha ikkasinni roorenkanni mittimmanke kaajjinshe agaratenni latishshanke halashsha hasiissanno yitino.
Birra 10, 2015 M.D Hamuse
