Addis Ababa:- Itophiyu Federaalete mootimma Tigirayete qoqqowira mannihimmate irko garunni iillishate qixxaawo assitinota xawissino.
Tigirayete qoqqowira mannihimmate irkonna owaante hanafisiisa lainohunni xawishsha fushshitinoti mootimmate komunikeeshine owaante; Itophiyu gargarooshshu olanto muli barruwa giddo Tigirayete qoqqowira boode quchumma cancishaanote anganni wolassitinota harunse mannihimmate irko qinaawino garinni shiqinshannita egensiissino.
Mootimmate komunikeeshine owaante xawishshisenni; olanto quchummate qooxeessira harinsanni oli hee’rannokki gede wo’naaltinotano qaagiissino. Gargarooshshu olanto quchummate ola harinsannikki gede uynoonni hajajo gumulatenni keeraano qansooti gawajjantannokki gede assitinota kaysinohu xawishshu; olanto xaa yannara Shire, Allaamaaxanna Koremi quchummara ola harinsikkinni wolassite qorqora dandiitinota egensiisino.
Itophiyu gargarooshshu olantu harunsitino harinsho; cancishaanchu HWHT kaphu duduwo fincitanni keeshshitino bissa hasatto toltannokki gede assinoha ikkasino xawishshu leellishino.
Babbaxxitino kaa’lote uurrinshuwanni ledo qinaawatenni Gargarooshshu olanto qorqortino qooxeessuwara mannihimmate irko qinaawino garinni iillishate mootimma ikkado qixxaawo assitinota xawinsoonni.
Mannihimmate irko shiqisho Shire horophilu fooliishshi’ranno hoowe horonsi’ratenni iillinshannitano xawishshu egensiisino.
Wole widoonnino, Aliyye Gondare widoonni Shire massitannonna Kombolchu widoonni Dese, Woldiya, Qoobbo, Allaamaaxa massitanno doogga mannihimmate irko rahotenni shiqishate horonsi’nannita xawinsoonni.
Mannihimmate irko garunni iillitanno gede qineessitanno komite babbaxxitino bissanni fille uurrinseenna loossa hanaffinotano Owaante egensiissino.
Loossa tekinikaawe ikkitino xiinxallonna gaance kalaqantino qooxeessuwara hasiissanno owaante hanafisiisa dandiisiissanno loossa leddannotano Mootimmate komunikeeshine xawishshi leellishanno.
Amsaalu Felleqe
Birra 10, 2015 M.D Hamuse
