Addis Ababa:- Sidaamu qoqqowi mootimma Sidaamu buni barra “Buninke jireenyinkera” yaanno uminni Hawaasi quchumira ayirrinsoonni.
Amuraatu aana leelle afii fanote hasaawa assinohu qoqqowu pirezidaantichi kalaa Desta Ledamohu coyi`rino garinni; Sidaamu daga bunaho haaro daga dikkitino, Sidaamu dagara bunu miinju xintasiitinna dagoomittetete xaadooshshe kaajjishirannoho yino. Kalaa Desta tenne coyi’rinohu Sidaamu qoqqowira 45 bunu laashshaanora, soyanote, uurrinshuwatenna ogeeyyete afamishshunna galatu bere aanaati.
Buna islaanchimmatenninna batise laashshate harinshonni woyyino guma borreessiisa dandiitino bissaraati afamishshu amuraate qixxeessinoonnihu.
2014 baajeettete dirinni 27 kume toone hayishshaminohunna hayishshaminnokki buni qoqqowunni mereerima dikkora shiqino; konninnino 1 xibbe 9 miliyoone doolaare gobbayidi soorro afirate dandiinoonni.
Sase dirrara assinoonni heewonni Sidaamu buni sidaamu buni qeelinota xawisinohu kalaa Mesfin Qarre; tayxe baajeettete dirinni tenne kiiro lossatenni 50 kume toone shiqishate loonsanni afammannita huwachishino.
Abbebech Maatewoos
Birra 10, 2015 M.D Hamuse
