Abbebech Maatewoos
Arbaaminc:-Gobbate noo buxima hunate laashsha Itophiyu dagara banxe assinannita ikkitukkinni gadacho ikkinota industirete ministere egensiissu. Konne handaara lossate massagaanote murci’raanchimma hasiissannotano buuxisiissino. Industirete ministire dieeta kaala Taarreqeny Bulultahu xawisino garinni; gobbankera rumuxxitinota buxima layinki higgannokki gede hunate laashsha callicho doorshaati.
Itophiyaho noo jirubba xaara kisantinokkirenna Itophiyu daga anganna surre qineessine horonsi’ra dandiina geeshsha agartannoreeti; ikkollana kayinni handaara lossate massagaanote murci’raanchimma hiitte yannannino aleenni hasiissanno yiino.
Daga agartanno yawo fulatenni Itophiya lossatenna soorrate looso loosa hasiisanno yiinohu ministir dieetu; massagaanchimma gobba soorratenna lossate ragaanni jawa qeecha fulate yino.
Xa kaayyaataamma ikkite massagote deerri aana noo mannooti tenne kaayo horonsidhe baxxinohunni industirete handaarinni leeltanno qarrubba tira hasiissannonsata xawisino.
Industirete handaarinni babbakkino sooreeyye ajay ajeenna yawo uynoonninsa bayichi aana soorro borreessiisa noonsa yinohu kalaa Taarrekeny; Itophiyu laashshitanno gede dandiisiisa hoongummoro gobbate gede sufa didandiineemmo yeeno xawisino.
Gobbate noo buxima gatisateno laashsha Itophiyu dagara banxe assinannita ikkitukkinni gadachoho yaatenni; industirete handaari woyyitino laalchimma heedhasira dandaannonna sufote heewisamancho assara dandaanno handaara ikkasinni illacha uyne loosa hasiissannota coyi`rino.
Xa Itophiya massagate aana noo mootimma calla ikkitukkinni sa`u mootimmuwano gobba industirete widira eessate babbaxxitino wo`naalshuwa assitanni keeshshitinota kayisatenni hiitte yannannino aleenni handaaraho massagaanote murciraanchimma leella hoogguro handaaraho soorro daggannokkitaati buuxisiisino.
Mootimma industirete handaarinni kalqoomu deerrinni laalchunni heewisamatenna Afriku deerrinni laalchu mereersha ikkate ajuuja amaddeeti yino.
Industirete handaarinni laalchunni heewisamatenna laalchu mereersha ikkate ajuuja gumulanna industire massagooshshu qeecha fultanno gede dandiisa noonke yee lede coyi`rino.
Konne gumulate mitte doogo gede owaatannohu “Itophiyu laashshito” millimillooti yinohu ministir dieetu; konni albaanni massagaano illacha uyteenna loosantino loossanni Itophiyu laashshito millimillo mittu ajandi gede adhamooshshe afirasi industirrate lophora umise qeecha fulannoha ikkasi xawisino.
Kalaa Taarrekeny xawishshinni; Itophiyu laashshito millimillo konni aleenni lopha noosihonna laashshaanote industire handaari hasi`ranno deerrinni irkisamanno gedenna milli yaanno gede assinara hasiisannoho. Wole widoonni qole poolisete ragaanni industirete handaara hasiisanno garinni irkissanno poolise heedhara hasiisanno.
Poolisetenni hajo la`annonsa bissa beeqqitinnonna qarrubba badantinoho yinohu kalaa Taarrekeny; poolise loosu aana hassanno yannara haammata haaruudde coyebba haadhe daggannota coyi`rino.
Albilcho mootimma handaaru giddo seeranna wodho qixxeessate guffa kaysate qeecha ikkinnina industirete handaari ayiddi hallanyu handaara ikkanno gede loonsannita xawisatenni; hallanya dureeyyeno industirete handaarinni laashshate e`anno woyte womaashsha, baatto, caabbiichonna xintu latishshuwa hattono gumuruukete hajubba qarri kalaqamannonsakki industirete qooxeessa kalaqate loonsanni loossa mootimmate widoonni kaajjite suffanno yino.
Bakkalcho Birra 3, 2015 M.D
