Abrahaam Saamueel
Addis Ababa:- Daga gobboomu amaale baqqinatunni beeqqa hasiissannonsatanna massagaanono qeechansa fula hasiissannonsata Gobboomu Amaale Komishiine Komishiinerchi Pirofeeserchi Mesfiini Ariaya xa`mino.
Gobboomu Amaale Komishiinerchi Pirofeeserchi Mesfiini Ariaya; komishiine Affaarete, Beenishaangul Gumuzetenna Gaambeellu qoqqowi daga ledo hasaawa assitu yannara yiino garinni; gobboomu amaale harinsho giddo baalunku qoqqowi daganna dagoomu beeqqaano ikkitanno gede assate jawaata looso loonsanni hee`noonni.
Komishiine Affaarete, Beenishaangul Gumuzetenna Gaambeellu qoqqowi Dagate Riqiwamaano Amaale miilla ledo lamu barrira keeshshannoha hasaawaho kaima ikkitanno hedubba gamba assate hasaawa Addis Ababaho harissanni no. Konne ikkeenna, gobboomu amaale aana daga baqqinaatunni beeqqaano ikkitanno gede assate dagate mule noo massagaano qeechansa fultanno gede xa`mino.
Itophiyu hiikkonneno sumuu yaa hoogate hajo tirate haammatu hornyi noose gobba ikkitinota xawisinohu Pirofeseerchu Mesfiini; gobboomu amaale qinaabbanno gede baalunku qansichi beeqqo hasiissannote yiino.
Daga baqqi yitino beeqqo assitanno gede dagate mule noo massagaano qoodansa fula noonsatano coy`rino.
Sasu qoqqowinni dagate riqiwamaano ledo assinanni hee`noonnihu hasaawaho kaima ikkitanno hedubba gamba assate hasaawi battalano konne illachiishinote yiino.
Riqiwamaano, gobboomu amaale hasiishshanna harinsho aana qooxessinsa daga kakkaysatenninna huwachishate widoonni kaajjado massagonni loosa noonsata huwachishino.
Komishiine, dagate widira shiqqi yite hasaawisate albaanni hasaawunni afi`nanniti hedo lowontanni horo uytannota ikkitinota huwata hasiissanno yinoonni.
Bakkalcho Birra 3, 2015 M.D
