Abrahaam Saamueel
Xaphoomu Ministerichi Abiy Ahimed (Dr) gobboomu arri qamadete latishsha Somaalete Qoqqowira faajjete hanafisiisino.
Xaphoomu Ministerchi Dr Abiy Ahimed Somaalete Qoqqowira Faafani, Zoonera Tulluguleet Woradira, Kululle olliira afame gobboomunnita arri qamadete latishhsa hanafisiisi yannara xawisanni, mitte mittente jifo giddonni kaayyo fushshatenni, qarra baala saayisanno looso loosatenni Itophiyu jireenya buuxisa dandiinanni yiino.
Itophiyu umisira agurranna wolehono ikkitanno qamade loosa dandanno yiinohu Xaphoomu Ministerchi Abiy, mitto mittonka qarra kaayyote widira soorrine qarraho hegersitino dawaro kalaqatenni Itophiya miinjunni jiraameessa assa hasiissanno yiino.
Xaphoomu Ministerchi Dr Abiy yiinonte gede, ninkera nafa sa`e woleho ikkitanno qamade laashsha hananfoommo; konni loosi doogono hananfoommo. Konnira jawa gede leellishannohu Somaalete Qoqqowooti. Qoqqowoho xaa yannara hekitaaretenni 40 kuntaala ale laashsha dandiinanni gara kalanqoonnita egensiisino.
Tayxe miliyoonetenni kiirranni kuntaala baara widira sonkeemmo yiinohu Xaphoomu Ministerchi Dr Abiy; kuni loosi qinaawanno gede assate massagaanote ledo baalunku hajo la`annonsa daga loosa hasiissannonsa yiino.
Ninke Itophiyu daga, hala`lado baatto, jawaata loosidhe galtino daganna shaqqado baatto noonke yiinohu Xaphoomu Ministerichi; qamadete ledo amadamino qarra wo`munni wo`ma tirate haaro dhagge borreessa noonke yiino.
Itophiya duushshine wolootahono ikkate tayxehu arri qamadete looso illete yiinohu Xaphoomu Ministerchi, 2015 M.D haammata kaayyonna hexxo noo diro ikkinotano xawisino.
Somaalete Qoqqowi Pirezidaantichi Kalaa Musxefe Muhamedihu isi widoonni, tayxe arri qamadete loosinni lame miliyoone kuntaala qamade laashshate qixxaawo assine hee`noonni yiino.
Pirezidaantichu Musxefe gobboomu qamadete latishsha qoqqowoho fajjetete hananfi yannara xawisinonte gede, qoqqowaho yanna yannatenni qalaqantanno moolle hegersino garinni gargaratenna laalcho lossate 2015 baajeettete diro arri qamadete loosinni lame miliyoone kuntaala ale qamade latisate qixxaawo assinoonni yiino.
Moolle duucha yannara assinanni kaa`lonni didandiinanni yine hananfoommo qamadete latishshinni, jawa guma afi`noommo yiinohu Pirezidaantichu Musxefe; qamadete latishshi waagu lexxonna moolle hegersitino doogonni tirate qeechise jawaho yiino. Sai dirono Somaalete Qoqqowi 847 kekitaare baattora qamade latisa dandiinota qummeessino.
2015 M.D Qoqqowoho afantanno sase lagganna balete waa horonsi`ratenni lame miliyoone ale kuntaala qamade laashshate qixxaawo jeefinsoonnita coydhino.
Tayxe arri qamade gobbomu deerrinni 1.3 miliyoone ximaade baatto latisatenni 52 miliyoone kuntaala qamade laashshate mixo amandoonni. Kunino, gobbate hasiissanno hasatto wonshe sae gobbara daddaloho shiqisha dandiinannita xawisino.
Sai diro arri gorsu qamdete latishshi 24.5 miliyoone kuntaala qamade laashsha dandiinoonnita Giwirinnu Ministeere xawissino.
Saiha shoole hoodeessino diro arri qamadete latishshinni afamino gumi Xaphoomu Ministerichinna woloota massagaano murcidhe loossino loosinninna waaxantino womaashshu irkonni hattono Gobboomu Qamadete Gorsu Pirojekte Qineesso Borrote mine dririisineenna jawa qeechase fultinota xawinsoonni.
Bakkalcho Birra 3, 2015 M.D
