Abbebech Maatewoos
Addis Ababa:- Barra 30/2015 M.D Hawaasi yuuniverisitera fonqolo adhitanno 12ki kifile fonqolamaano aana Tekinote hoowenna qara hoowe xaadisanno buusi toeenna rosaanote aana gawajjo iillitino konne harunse IFDR Rosu ministere ministirchi Prof Birihaanu Naggihu Hawaasi Riferaalete hospitaalera leellatenni gawajjo iillitunsare xa’mino.
Piroofeeserchu Birhaanu Neggahu “Qaru coy ki`ne woyyimmaati; fonqoloho yaaddinoonte” yino; dano iillitinonsa rosaano fayyimmansa aana illachishshanno gedeno amaalino. Danotenni lubbamino mittu rosaanchirano macciishshaminosiha luphiima dadille xawise; rosaanote ayiddiranna maatete shesho halchino.
Iillitino danonni gobbate gede dadillineemmo; kayinnilla tini harinsho fonqolu amanyooti moorunni agarameena rosaano uminsa wo`naalshinni gumaamma ikkitanno gedenna woyyitino gobba gatamaarate ikkinohura konninni hexxo mudha dinonke yino. Oosote ayiddino konne huwatte rosu dagoomi ledo gutunni uurritanno gede xa`mino.
Ministirchu, kalaqantinoti buusu toa dano wole qarra abbitannokki gede rosaano gatisate qeechansa fultino fayyimmate uurrinshuwara, Hawaasi yuuniverisite dagoomiranna qooxeessu teesaanora galata shiqishino.
Hawaasi yuuniverisitera tenne lamala giddo iillitino dano korkaatinniumi barra taxxi yiino fonqoli layinki barra hanafaminoha ikkanna; piroofeeserchu Birhaanu Neggahu fonqolo uynanni gara basete leelle towaatino.
Hawaasi yuuniverisitera 2014 rosu dirinni 12ki kifileha gobboomu deerri fonqolo adhate 42 kume ale rosaano gaamantinoha ikkanna; umi doyichonni dagoomu sayinse rosi handaarinni gaamantino 34 kume ale rosaano lamala mereershuwara fonqolo adhitino.
Barraho Sidaamu qoqqowi pirezidaantichi kalaa Desta Ledamohuno Hawaasi yuuniverisitera siwiilu buusi toasinni kalaqantino danonni gawajjantino rosaano hospitaalete leelle xa’mino.
Yuuniverisitete giddo kalaqantino danonni gawajjantinore 12ki kifile fonqolo adhitanno rosaanora xaginatu owaante uynanni hee’noonniwa babbaxxitino fayyimmate uurrinshuwara leelle towaanyo assatenni xa’minoha ikkanna hedeweelcho danonni iillitino gawajjo lainohunni macciishshaminosi dadilleno xawisino.
Pirezidaantichu barraho xawishsha uyinoha ikkanna; xawishshinni rosu isilanchimma agarsiisate hende mootimma umi yannara rosaano jawiidi rosu uurrinshuwara 12ki kifile fonqolo adhitanno gede assinoonniti xawoho yee; konne harunse 12ki kifile rosaano jawiidi anga Hawaasi yuuniverisitera lamala kaampaasera gaammoonnita kayse ;Hawaasi Yuniverisite tekinolojete hoowenni jawiidi hoowera eessannohu siwiilu buusi toeenna 451 rosaano gawajjantinori giddonni mittu rosaanchi lubbo sa’ino yiino.
Qoqqowu mootimma dano kalaqantu yannanni hanaffe jawa sharro assatenni danotenni iillitanno gawajjo ajinshoonnita xawise; gawajjamaano rahotenni fayyimmate uurrinshuwa iillinshoonnitano coyi’rino.
Kalaqantino dano korkaatinni fonqolo adha dandiitinokki gawajjamaano rosaano xaginaatu owaante afidhe fultu gedensaanni fonqolantanno injo kalanqannita pirezidaantichu lede xawisino.
Hedeweelcho dano kalaqantu yannara ga’labbote bissanna fayyimmate uurrinshuwa hattono dagoomu assino irkoranna fultino qeechi daafira galatasi shiqishino.
Jeefoteno pirezidaantichu kalaa Desta Ledamohu; gawajjamaano rosaano maatera jawaante halchatenni mootimma waatinsara ikkitinota xawisino.
Bakkalcho Birra 3, 2015 M.D
