Addis Ababa:- ‘’Irreechu ayyaani heellicho ikkitinori keeru, roduuwimmanna mittimma wo’manka woyte qaagamanna gumulama noonsa’’ yiino IFDR Xaphoomu Ministirchi Dr Abiy Ahimedi. Xaphoomu ministirchi Irreechu Ayyaana lainohunni hawalle iillishi’ne yitanno sokkano saysino.
Mannu loosinonna kalaqamu danonni gatisenke, shiimaaddanna jajjabba diinnanke aana qeelle oyeenke, xawaabbu widira reekkisinonke Kalaqaanchira lowo galati hasiisannosi yiinohu Xaphoomu Ministirchi Dr Abiyi; hawalle xawaabbu yannara keerunni iillishi’ne yiino.
Oromote daga Gadu amanyootinni ragidhino balchoommanni hawadi yanna sa’e adalchu xawaabbi yannara e’u woyte hawado saysinoha, laalchu mu’ranno gede assinoha, gate latisino Kalaqaancho shama hayisso amadde laga dirrite ‘’Mareho, Mareho, Mareho’’ yitanni galaxxitanno yiinohu Xaphoomu Ministirchi; Irreechu ayyaani tunsicho sa’ne xawaabbu yannara ikkannoha jawa galatu ayyaana ikkasinni baalanti Oromotenna Itophiyu daga hawalle iillishi’ne yeemmo woyte hagiirrunniiti yiino.
Kalaqaancho galaxxate laga dirritanno daga amaddinota shama hayisso way aana woransara albaanni Abba Gadootu, ‘’mimmiti’ne ledo keereho?, Kalaqaanchi’ne ledo keereho?, kalaqamaho keereho?’’ yitannota qara qara Sase xa’mo xa’mitanno yiinohu Xaphoomu Ministirchi; ayyaanu beeqqaanono ‘’keereholla!’’ yaatenni galatu amanyoote gumultannota huwachishanno.
Konni daafira mannu baalu konni amanyootinni roso adhe kalaqaancho galatate laga dirranno woyteno ikko higanno woyte keere dirrisa agarantannonsa yiinohu Xaphoomu Ministirchi; Irreechunni kalaqaanchoho galatu shiqannohu kalaqamu seeri soorrame kalaqama gawajjannokki gede ikkasinni aleenni ayyaanu keerunniha, maaronnihanna baxillu xawishsha ikkasi xawisino.
Irreechu ayyaani hedotenna loosunni keeraa’minanni ayyaana ikkasinni rabbanna su’ma huna ayyaanu xawishsha ikkitinokkita huwante qorowama hasiissanno. Ayyaanu aana kalaqamu seera lainohunni roso garunni uynanni daafira farco xeisanna halaale maaxa seera xiiwate gede kiirranni. Konnira daga co’o ikkino wodaninni galataho shiqa agarantannonsata xawisino.
Gadu amanyootinni mittimmanna roduuwimma jawa baycho amaddannota xawisinohu Xaphoomu Ministirchi; mitteenni loosanna mitteenni saga’la irkisamanna mittimmatenni uurra hattono farcote mitteenni sharrama hundi bude ikkasinni budu garinni manna baala sirchunni, amma’notenni ga’retenna koo/ teenni babbandikkinni taalo la’’anna shiqisha hasiissannota huwachishanno.
Dhaggenkenni mitto ikkine diinnanke albaanni qeelamme diegenninoommo; bareende ikkinnina shanshe xawishshanke dikkino; olu xawirano ikko loonsoonninke sharrenni ola mittimmatenni fulle baalante basera qeelle afi’ranke sa’uta shoole dirra sharro la’’a calla ikkitanno yiinohu Xaphoomu Ministirchi; wole basera qeelle assinoommonte gede qara diinanke buxima qeelate baalunku bobbahino loosu handaarra baalantenni murci’re loosanno gede huwachishinno.
Qiddist Gezaheny
Bakkalcho Wocawaaro 26, 2015 M.D
