Hawaasa:- Sidaamu dagoomu qoqqowira konistiraakishiinete handaarinni leeltannota diizayinetenni hanafe isilanchimmatenna yannatenni gumulama hoogate widoonni leeltanno qarrubba tirate loonsanni hee’noonnita Qoqqowu Quchumu Latishshinna Konistiraakishiinete Biiro egensiissu.
Biirote sooreessi kalaa Fiissi Fichooli baxxinohunni Itophiyu pireesete uurrinshara xawisino garinni; qoqqowoho konistiraakishiinete handaari konni albaanni baca qarrubba noohonna mooraanchimmatenna muishshaho reqecci yinoho.
Qoqqowoho afantanno quchummara minnani ijaarranna loonsanniti safote latishshuwa diizayinete loosinni hanafe isilanchimmate anje; pirojekituwa amandiinni yana giddo hanafante gumulama hooga; bejetete anjenna kontiraakiterootu widoonni pirojekituwa e’ino sheemaati garinni loosse gumula hoogate qarrubba hala’ladunni leeltanni keeshshitinotano xawisino.
Babbaxxitino hadaarranni hanafantino pirojekituwa amandoonni yanna giddo hanafante gumulantannokki harinsho noota tirateno baxxino garinni gumulshu biddissa qixxeessatenni hadaaru mitiimmubba tirate dandiinoonni yiinohu sooreessu; xaa yannarano konni albaanni hanafantu gedensaanni seeda yannara amandoonni yannanni loosate gumulantinokki pirojekituwa yannatenni gumulama hoogate kaima ikkitino qarrubba bande tiratenni gashshootunna seeru garinni gumulo uyne pirojekituwa harancho yanna giddo loosante gumulantannonna agarranni illachira hossanno gede assa dandiinoonni yiino.
Qoqqowoho xaphooma konistiraakishiinete handaarinni xaano tirantinokki qarrubba noota qummeessinohu kalaa Fiissi; Hawaasi quchuma lede qoqqowoho duuchante quchummara seerimale ikkitino doogganni minnanni ijaarshuwa qorqorsha assatenni quchumma pilaanetenni massagantannonna deerransa agartino ijaarra minantanno gede assinanni hee’noonnita xawisino.
Konne handaara tekinolojetenni irkisamanno gede assatennino kontiraakiterootunna pirojekituwate tajubba garunni maareekkatenninna harunsonna irko assatenni hattono handaarunni rumuxxite keeshshinoha mooraanchimma, muishshanna baincho assoote gargaratenni handaarunni leeltanno qarrubba tiratenni quchummate loonsanniti konistiraakishiinete hadaari loossa isilanchimma agartinota assate mixi’ne loonsanni hee’noonnitano lede qummeessino.
Amsaalu Felleqe
Bakkalcho Wocawaaro 19, 2015 M.D
