Addis Ababa:– Aantanno hawadi yannara qoqqowoho lolahunna bushshu hoshooshshammenni kalaqantara dandiitanno dano gargarate balaxote qixxaawo assinanni hee’noonnita Sidaamu qoqqowi danote bidhattonna balaxote qoropho komishiine komishinerichi Awarri wiilihu xawisino.
Hawaasi garbi laayyo qooxeessira loonsanniha bushshunna wayillasote agarooshshi loossara ledotenni haanju latishshi loossano harinsanni hee’noonniha ikkanna baxxinohunni lolahunna bushshu hoshooshammenni kalaqantara dandiitanno dano balanxe gargarateno haja la’annonsa uurrinshuwanna bissa ledo loonsani hee’noonni yino.
Garbu qooxeessira duuchunku ragaanni loonsanniha qinaabbinota laayyote loossa harinsanniha ikkasinni quchumu gashshootino doogi-male horrine amandoonnita garbu qoxeessi baatto agursiisatenna quchumu giddo lolahu ga’rannowa fiine mooshshate loossano kaajjinshe lonsannita komishinerichu egensiisino.
Wole widoonnino ximbiiwaqminohu xalalu wayi baattote giddoonni ha’re garba eanno gede assateno garbunniwa e’nanni furchora loonsannihu du’namaancho xalalsinanni loossa gumulantanni no yinohu komishinerichu Abarri; tenne loossa yinoonni yanna giddo gudateno qoqqowunna federaalete la’annonsa uurrinshuwa ledo gutunni mixi’nenna amaallanni loonsanni hee’noonnita xawisino.
Hawaasi garba gobbaanni qoqqowo lolahunna bushshu hoshooshammenni gawajjantara dandiitanno qooxeessuwano badate looso loonsoonni. Kuri kalaqamu danonni lawishshahono sai dirira Arbegoonu woradira iillitino danonni maatete giddo lamu manni mitteenni lubbantinota qaagiissinohu komishinerichu; qoqqowoho baalante qooxeessuwara labbanno kalaqamu danonni mannunna jajju aana gawajjo iillitannokki gede assate mala mallanni hee’noonni.
Qoqqowoho baxxinohunni alichaame qooxeessuwara baattote hoshooshama jawu garinni kalaqantara dandiitanno yine huluullammannitanna labbanno danora reqecci yitara dandiitanno yine bandoonniri Gorche, Malga, Arbegooni, Bansi, Bursu, Hula, Booni Cirrenna Arooreessu woradda ikktanna wole widoonni kayinni lolahunni gawajjantara danditanno yinoonniri Lokka Abbaayyu, Hawaasi gaangaawinna Gorcheno kullannireeti yinoonni.
Xaa geeshsha la’noonnihunni kaajjado xeena ganinokkihanna gawajjo iillitinokkiha ikkirono aantanno hawadi agannara kalaqamu ikkitonni kalaqantara dandiitanno dano balanxe garagarate Biheeraawe Metirolojete Ejense ledo yanna yannantenni mashalaqqe soorri’nanni qooxeessuwate dagoomino uminsanni balaxote qoropho assitanno gede rosichono uyinanni hee’noonnita qummi assino.
Komishinerichu amadisiiseno; dagoomu baadiyyete qooxeessuwara konni albaani kalaqantino ikkitubbanna uyinannisaqorophote rosichi kaiminni uminsanni hattono dagoomitte heeshshonsanni kawa ka’a millisanno yannara lamu goommi xexxerrisa horonsidhe wo’mitino lawonna ga’rino lolahi giddoonni tayisse sa’’ate assitanno wo’naalshinni dano kalaqantara dandiitanno daafira qoropho assa hasiissannota kulino.
Quchummate qooxeessirano aantanno hawadi yannara xeeni hanafara albaanni haja la’annonsa bissanna dagoomuno halamatenni du’namaanchunna lolahu ha’rano booe feyaatena du’namaanchu sa’’annota ho’lara dandaanno ishine garunni hoolatenni hedeweelcho lolahu wo’menna doogosi so’reenna mannunna jajju aana kalaqantara dandiitanno dano balanxe gargadhinanni gede qeechansa fula hasiissannota kawaanni qole qorophote sokkasi sayisino.
Amsaalu Felleqe
Bakkalcho Onkoleessa 26/2013
