Addis Ababa:- ‘’Bayi’riidi Itophiyu haaroo’mate kofatto Itophiyu daga halammummoro qarrubbanke sa’’anna la’noommowa iilla dandiineemmota leellishshinote’’ yaatenni Sidaamu dagoomu qoqqowi mootimma pirezidaantichi kalaa Desta Ledamo xawisi.
Pirezidaantichu, haaroo’mate kofatto 2ki Terbayine caabbichu wolqa burqisa hanafase lainohunni; ‘’Hawalle hagiidhtinoonni’’ yitanno sokkasi saysino.
Sokkasinnino, kofatto mittimma kaajjishshanno siiwo, murci’raanchimmate lawishshimmanna dagate mittimma xawisannoteno yiino.
Kofatto gutu sumuda fooliishshiinshoonni malaate ikkasennino aleenni ilama mittoonsitanno sumuda ikkitinotano pirezidaantichu lede coyi’rino.
Kofatto caabbichu wolqa burqissannokki gede assate sharrantanni keeshshitino diinnata xiiwonna kaphu piropagaanda qeelatenni seyoote widira iillinoonni yiino.
Konne baala qarra sa’’ate hayyotenni wo’mitino bayi’ranna maala’lissanno diploomaasete loossa loosantinota kaysinohu kalaa Desta; qixxeessinoonni sharre duuchanti mulla ikkiteenna Itophiyu daga naaxxitinotanna hagiidhitinota coyi’rino.
Amadisiiseno, Abbay angatenni amandannihanna la’nanni halaale ikkino yaatenni xawisinohu pirezidaantichu; kofatto Itophiya caabbishshara, jajjabba industirrankerano wolqate bue ikkitara qixxaawase ilamannita dirrate keeshshitino gaabbo qoltanno dhaggete loosaanchimma fojooti yiino.
Kofatto konne deerra iillitanno gede Itophiyu daga baalanti irko assitinotano lede xawisino.
Abbebech Maatewoos
Bakkalcho Woxawaajje 12, 2014 M.D
