Abbebech Maatewoos
Addis Ababa:– Qoqqowoho tayxe haanju haruminni xaa geeshsha 300 Miliyoone ikkanno haqqu sircho kaansoonnita Sidaamu Qoqqowi Irshunna Kalaqamu Jiro Latishshi Biiro egensiissu. Biiro xaphooma 302 Miliyoone haqqu sircho qixxeessate mixo amadde mixote garinni gumula dandiitinota kulloonni.
Sidaamu qoqqowi Irshunna kalaqamu jiro latishshi biiro sooreessi kalaa Mesfin Qarre baxxinohunni Itophiyu pireeste uurrinsha Bakkalcho Gaazeexxira xawisino garinni; 2014M.D 4ki doycho haanju harumi looso sai Dotteessu aganinni hananfe loonsanni keeshshinoonnita xawise; Sau lamalara mittu barrinni 25 Miliyoone haqqu sircho kaasate hende 26 miliyoone kaansoonni yiino.
Konninnino xaphooma qoqqowoho xaa geeshsha 300 Miliyoone haqqu sircho kaasate dandiinoonnitanna 47 kume Hektaare ale ikkitanno baatto haqqu kaashshinni diwa dandiinoonnita coyi’rino.
Gobbate deerrinni haanju harumi looso hananfi yannanni kayse xaa geeshsha xaphoomunni Shoolu diri giddo Sidaamu qoqqowira 1 Biliyoone haqqu sircho kaasate mixo amande loonsanni keeshshinoonni yiinohu sooreessu; ikkollana mixotenni amandoonni kiironni sa’u lamala geeshsha 873 miliyoone ikkannoha gumula dandiinoonnita lede xawisino.
Haqqu kaashsho kaasate loosira qoteho kaasamino kaashshira agarooshshenna harunso assatenni xibbuunni 84.4% ikkitannota sirsa dandiinoonnita assinoonni keenonni buunxoonni yiino kalaa Mesfini.
Kaansanni kaashshi haanju latishshinni sae sagalimmate kaa’lanno gede illacha tungoonni yaannohu biirote sooreessi; baxxinohunni 7 miliyoone gummate laalo sircho qixxeessate mixi`ne 6.3 miliyoone qixxeessinoonniha ikkanna konni giddonni Abukaato xibbuunni 90% ikkitannota qummi assino.
Jeefoteno haqqu kaashsho kaasa calla ikkikkinni kaansoonniti hasi`noonni illachira hossanno gede assate towaatanna saadatenni kikkisantannokki gede huxxa, shuqunanna iibbillu bati’ranno waa hayikkisa hasiissannotano sooreessu lede huwachishino.
Bakkalcho Woxawaajje 5, 2014 M.D
