Abrahaam Saamueel
Hawaasa:- Mootimma simintote ledo amadisiisame kalaqamino waagu lexxo ajishatenna qarra tirate beekkanno maamarra widoonni hira hananfannita Sidaamu Qoqqowi Daddalunna Industirete Biiro egensiissu.
Sidaamu Qoqqowi Daddalunna Industirete Biiro Sooreessi Kalaa Ashshaagire Jemberehu uyno xawishshi garinni; gobbankera konstiraakishiinete handaari widoonni noo qarra badatenni ijaaraho hasiissanno siminto hirranni amanyoote soorra hasiisinohura IFDR Daddalunna Qooxeesssu Xaadooshshi Ministire haaro biddissa fushshinoti qaangannite.
Biddissa kaima assine qoqqowu noo deerra la”atenni Biiro haaro biddissa fushshitinota xawise; konni albaanni siminto beekkanno daddalaano widoonni hirrannita hoolle keeshshinoonnitanna konni garinni suffannokkita kulino.
Konni gedensaanni Siminto Qoqqowoho Sidaamu Lophote Korporeeshinenna Plc widoonni shiqanno gedenna 44 wedelli maamarra 660 yuniversitetenni digirete maassantinori widoonni beenkannita egensiisino.
Wedellu tantano seerunni irkisama noosita xawise; tenne doychonni calla shoolu mereershira yaano Hawaasa, Lakkote, Alatta Wondonna Daayye quchummara beekkanno maamarra widoonni siminto hira hananfannita buuxisino.
Ijaaru harinsho qorqorate biiloonye uynoonnihu Qoqqowu Quchumu Latishshinna Konstiraakishinete Biiro siminto hasiissanno mootimmate pirojekte, hallaynu latisaano, mittimmate loosi maabbarranna gallanni mini ijaari harinsho harunsitanni uytanno irko kaima assine fajjinannitanna mootimmate pirojektera balaxo uynannita Sooreessu huwachishino.
Siminto beekkannori mootimma fushshitino waaginni calla hirtanno gedenna fajjinoonnisi siminto hidhe milli yaanno yannara seerunniha darrasanyu taje angasira amada noosita Biirote Sooreessi qaagiissinota Biirotenni afi`noonni mashalaqqe buuxissanno.
Bakkalcho Woxawaajje 5, 2014 M.D
