Addis Ababa:- Itophiyu babbaxxitino amma’no gadachante ikkikkinni baxxenna fajjite adhase mittimmaseranna kaajjilleho mitto kora ikkase IFDR Pirezidaantitte Sahleworq Zewudeti xawissu.
Pirezidaant Sahileworqi Itophiyaho amma’note uurrinshuwa gambooshshi 14ki uurrinshu gambooshshi aana afante sayissino sokkanni; xibbuunni 90 anga ale ikkitannoti Itophiyu daga ammanaanote.
Itophiyu addi addi amma’no gadachante ikkikkinni baxxe adhitinoti kaajjillisera mitto koraati. Itophiyaho noori amma’note uurrinshuwa batinye sanna kiirsiissinorenna naaxxisiissanno dhagge noonsare ikkansa qummi assitinoti Pirezidaantitte; amma’note annuwa macciishsha baaluri aleenni jawate.
Konnirano noonsa adhamooshshe horonsidhe ammanaanote yannasi agadhino roso iillishatenni qansootu mannoomitte uddidhanno gedenna gobbansara ikkanni nooha shigiggisanno assoote ledamannokki gede qeechansa fultanno gede assa hasiissannonsa yitinno.
Itophiyaho rosaminokki garinni qansootu aana iillitanno shetto batidhanni noota kayisse; amma’note uurrinshuwara mannoomittete loosi barru barrunku loosonsa ikkanno gedenna roduuwu mimmitinsa aana kakkacha agurtanno gede loosa hasiissannonsata xawissino.
Gobbate babbaxxitino yannara kalaqantino gaancenni qaensanni darante fooliishshi’nanni basera afantanno qansooti albi heeshshonsawa higganno gede assateno amma’note uurrinshuwa lede wo’manti Itophiyu daga sharrama noonsata huwachishshino.
Techoo Itophiyira keeru aleenni hasi’neemmo hajo nookkita kayissinoti Pirezidant Sahleworqi; hasi’neemmo keere buuxisate baalunku qeechanke garunni fula noonke yitinno. Mitte mittente amma’note uurrinshuwara daga owaatate ayyaana kaajjishanna farco halashsha gobbankera leellannoha haammata qarra sa’neemmo gede kaa’lannonke; amma’note uurrinshuwano amma’note annuwino harunsaanonsa rosiisatenna seejjatenni gobbate keerira qeechansa fula hasiissannonsa yitino.
Itophiyu, baalunku qansichi taalo keerunni hee’ranno gobba ikkitanno gede mittimmatenni ka’’a heedhannonketa huwachishshanno. Itophiyu hiittenneno lophitanni noo gobba gede lophonna latishshu hasiisannose yitinnoti Pirezidantitte; tenne lopho abbate amma’note uurrinshuwa lede baalunku halamanna mittimma lowohunni hasiissannota qummi assitino.
Gambooshshu aana leelle sokka sayisinohu Itophiyu amma’note uurrinshuwa songo gambisaanchi Bitsui Abune Gorgoriyosi; amma’note uurrinshuwa mereero leellannohu keeraancho ikkinokkihu heewote ayyaani gobbanke keerenna mittimma gawajjannoha ikkasinni tenne ikkito uurrisa hasiissannota huwachishino.
Gobbate keere halchotenni calla buuxisa didandiinanni yiinohu Bitsui Abune Gorgoriyoosi; addi addi amma’nuwa keerehonna araaraho safo ikkitinohura amma’note uurrinshuwa massagaano Kaaliiqiwiinni uynoonninke keere odeessate sokko garunni fula hasiissannonke yiino.
IFDR Keeru Ministirchi kalaa Binnaalf Andualemi isi widoonni; amma’no mittu manchino ikko dagoomu giddo keeru hala’lanno gede kaa’lose luphiimate.
Baxxinohunni, Itophiyu gede roore anga daga ammanaano ikkitino gobbara keere abbate amma’note uurrinshuwa qeechi luphiima ikkasi qummi assino. Itophiyu amma’note uurrinshuwa Itophiyu dhagge giddo gobbate gatamarshira, dhaggenna dona ilamate saysatenna kalaqamu jiro agarate kaa’lonsa luphiima ikkase kayse; daga kalaqamu qoomamanni agarantanno gede jawaatte huuccattotenna gobba saysatenni luphiima qeecha fultino yiino.
Muli yanna kawa Itophiyahonna woloottu gobbuwara amma’note su’minni kalaqantanno gaance hala’la huluullissannota ikkitino yiinohu kalaa Binnaalfi; gaancete kaimu amma’no ikkikkinni sheexaanu woy horo hasidhanno shiima kiiro noonsa mannootinni kalaqantannota ikkase huwata hasiissannota qummeessino.
Konnira, wo’mante Itophiyu dagaranna amma’note uurrinshuwara togoo qarri ba’’anno gede halamme loosa hasiissannota lede xawisino.
Bakkalcho Woxawaajje 5, 2014 M.D
