Amsaalu Felleqe
Addis Ababa:- Itophiyu pireesete uurrinsha Dese quchumira qixxeessitinohu ‘’Itophiyu Daafira’’ yaamantanno 8ki paanaalete hasaawa harinsoonni.
Barete hasaawu borro shiqishinohu Ustaaz Abubeker Ahimed gobboomitte gutu hornyubbanke aana illachishe hedosi shiqishino.
Ustaaz Abubeker amadisiiseno; ‘’Ha’nura gobboomitte gutu hornyubbanke qolanna Itophiya xagisa noonke’’ yaanniiti coyi’rinohu.
Ustaaz Abubeker kaysino hedosinni; Itophiyu qansooti bi’re yannara gobbanke ayirrinye gotti assino hornyi hee’ranno gede assitino kaajjadda dagaatinkanni; xaa yanna kayinni kuri hornyubanke duuchu garinni hoshooshantino.
Hoshooshantinonna hoshooshantanni afantanno ha’nura gutu hornyubbanke wirro qolateno lowonta qarrammeemmo daganna gobba dikkinoommo; korkaatuno, techo geeshshano angankera baca gutu hornyubba noonkere ikkinoommohuraati yiino.
Gobboomitte gutu hornyubbanke ragaanni Itophiyu qansooti gutu hornyi Ameeriku gutu hornyi ledo heewisanni shiqishinohu Ustaaz Abubeker; Ameeriku qansooti lee gobboomitte hornyubba noonke yitanno; roore anga ikkitanno hornyubbansa hallanya wolassate aana illachishshinote; Itophiyu qansooti hornyubba kayinni gobboomittenna gutu ayimma aana illachishshinote yaanni xawisino.
Itophiyu daga roore anga ikkitannoti amma’no harunsitannote; kuni gutu hornyinke gobbanke kaajjite hegertanno gede assinoho; konne hornyanke horonsi’ne gobbanke albi ayirrinyinna wolapho widira qola dandiinanni yaanniiti Ustaaz Abubeker lede huwachishinohu.
Itophiyu qansooti gutunni hee’ratenna kaa’lamate gutu hornyi noonke yiinohu Ustaaz Abubeker; kuri hornybbanke seeda sanna sa’anni dagginonna jifantanni sa’inote; hunonkenna umbenkenni ronse gatamarroommo hornyubbanke amande hara noonke yiino.
Xaa yannara gobboomitte gutu hornyubbanke qarru aana ubbeenna Itophiyu jifantanni no yee; gobbanke xagisatenna hurateno ninke gobbaanni wolu dino yaanniiti coyi’rinohu.
Bi’re hunda annuwinke loossinohunni addaxxa calla ikkikkinni insa faale amande Itophiya gutu hornyubbankenni xagisa noonke yaanni xawisino.
Amma’note ragaannino kalqete lawishshu gede kullanni daganna gobbaati yee; Isilaamuno Kiristaanu Qullaawa maxaaffa giddo kullanni gobbanna dagaati; konne hedanna agara hattono horonsi’ra noonke yiino.
Isilaamu amma’nonni Nebiyu Mehaammed Itophiya farcotenna keeru gobbaati yee farci’rino gobbaati; amma’note wolaphonna taalleenyino noose gobbaati; kuni hiittenne gobbarano nookkinna ninkeha gutu hornyanke ikkinohura kaajjinshe amadanna horonsi’ra hasiissannota huwachishino.
Bakkalcho Woxawaajje 5, 2014 M.D
