Qiddist Gezaheny
Addis Ababa:– Amandoonni 2015 bejetete dirinni Hawaasi quchumi lophonna turizimera baxxitino kaa’lonna tiro afidhino pirojekituwa gatamarate mixo amandoonnita Quchumu gashshooti egensiisi.
Hawaasi quchumi gobbankera rakkino lopho giddo noo quchummanni albisanna dooramaancho quchuma ikkinota kullanni.
Hawaasi quchumi gashshooti kantiiwi kaa’laanchu Pirofeesere Tseggaye Tukehu; amandoonni 2015 bejetete dirinni quchumu lophoranna turizimete iillora baxxitino kaa’lo noonsa pirojekituwa gatamarate mixo amandoonnita Itophiyu Pireesete Uurrinshara xawisino.
Quchumu keeri, Investimentete, Turizimetenna addi addi latishshu handaarra aana dooramaanchimmasi lexxitanni daggino yiinohu kantiiwu; baxxinohunni sa’u lame dirra giddo quchumu lopho xawissannore gummaamma loossa loonsoonni yiino.
Xaa yannara quchumu gashshootiti qara ajuuja quchuma dooramaancho turizimete iillo assa ikkanna konni alba noo turizimete jironni ledote wolootta quchuma konni aleenni lossitaranna egensiissara dandiitanno pirojektuwa loonsanni yiino.
Haaru bejetete dirinni quchumaho gatamarate mixi’noonni pirojektuwa mereerinni mitte Taaboori ilaali latishshi pirojekite ikkitanna, Sidaamu daga sharrote dhagge leellishshannore ilaala fushshitannore 130 deerra; hattono addi addi deerri noosiha yannaasincho gangalata loonsanni. Konninnino ilaalu quchumunna qooxeessu Turizime garunni leellishanno garinni kalanqoonni pirojekite garinni hananfoonni gatamarsha harancho yanna giddo gumulle daa’’ataanote fano assinanni yiino; kantiiwu.
Wole widoonni haaru garinni gatamarate hendoonnihu Shaashemennete widoonni Hawaasira eessanno waalcho quchumu biinfille, hattono Sidaamu bude, dhaggenna balchooma leellishshanno furcho qooxeessaho afantanno Miliniyeemete paarke ledo mitteenni lattanno gede assine mittu diri giddo loonse gumullannita xawinsoonni.
Hawaasi garbi qooxeessa latisate amandoonni pirojekitennino amandoonni dirinni 7.5 KM seendillinni garbu qooxeessa latinsanniha ikkanna Diizayinetenna ga’rafote looso jeefinse amandoonni dirinni loosu giddora e’nanni.
Xaa yannara quchumunniha safote latishsha yannaasinchu garinni base basente wonshate looso loonsanniha ikkanna wo’munku handaarinni quchumu lopho turizimete dooramaanchimmara gotti assitanno loossa loonsanni hee’noonnita qummi assinoonni.
Quchumaho konni alba haammata pirojekituwa hananfoonniha ikkirono hasiisanno illacha afi’ra hoogansanni goshooshantanni keeshshitino ikkito gatisatenni sa’u lame dirra giddo keeshshitino pirojektuwano ikko haaruudde hananfe amandoonninsa yannanni isilanchimmatenni gumulantanno gede assatenni maassante dagate owaante uytanno gede assinoonni yiinohu kantiiwu; haaru bejetete dirinnino quchumu lophoranna turizimete baxxitino kaa’lo noonsare haaruudde pirojekituwa hananfe harancho yanna giddo jeefisate illacha tunge loonsanni yiino.
Ledoteno Hawaasi quchumi deerranna biinfille leddannore yannaasincho lekkaasinunna gongo’mishamaanote doogganna minna loonsannihanna seeriweelo doogonni minantinore quchumu biinfille huntannore yannaa’mino garinni minantanno gede assinanniha ikkanna dooggate qaccera hallanyunni amadantino dargubba agursiisate loossa hananfoonnitanna pilaane agarsiisate harinsho aana dooggate qaccera baycho amadde lossanni keeshshitinore kayinse baalante sinu quchummara tantanante loossanno injoo kalanqanni hee’noonnita qummeessino.
Yannaasicho quchumma pilaanetenni massagama noonsa yaannohu quchumu kantiiwi; gumulami bejetete dirinni konni alba seeriweelo doogonni amadante keeshshitino dargubba qolsiisatenninna quchumu adawanna keere buuxissanno loossa loosatenni quchumu gashshooti pilaanetenni massagamanno gede assinoonnita kantiiwu lede xawisino.
Bakkalcho Woxawaajje 5, 2014 M.D
