Abbebech Maaatewoos
Addis Ababa:- Wodiidi daga, dagoominna manni qoqqowira kaphu rosu tajenni rosiissanni keeshshitino 34 rosiisaano aana qaafo adhinoonnita qoqqowu rosu biiro egensiissu. Biiro 2015M.D rosu wogganni haaro rosu amanyoote loosu aana hosiisate hajo la’annonsa bissa ledo tenne lamalara Wolayitta Sooddo quchumira hasaawa harissino.
Laynki pirezidaantichi balattonni dagoomitte kilaastere qineessaanchinna Wodiidi qoqqowi rosu biiro sooreessi Dr Dillamo Otore; rosu amanyooti 2014M.D rosu wogganni qoqqowoho doorantino 134 umi dirimi rosu minnara wo’naalshu deerrinni loosaminota xawisino.
Rosu amanyoote lainohunni rosiisaanote qajeelsha uynoonnitanna rosu aana noonsa qixxaambe filloonnitano coyi’rino. Assinoonni filonni 34 rosiisaano kaphu rosu tajenni rosiissanni afantannota buuxisino.
Rosiisaanote aana seerunna gashshootu qaafo adhinanninsa gede assinoonnita xawisinohu Dr Dillamo; rosiisaano qaxarate amanyooti aana qoropho assa hasiissannotano huwachishino. Amadisiisaminohunnino Wodiidi qoqqowira 2015M.D rosu wogganni haaru rosu amanyooti loosu aana hosanno assate baalanta umi dirimi rosu minna wo’mu loosira eessate qixxaawo assinanni afammanni yiino.
Wodiidi qoqqowi rosu biiro laynki sooreessinna rosu amanyooti qixxaawo loosinna tekinoloojete shiqisho handaari sooreessi kalaa Sintaayyehu isi widoonni; haaro rosu amanyooti loosira 26 miliyoone ale maxaaffa hattono maxaaffate attamora qole 4.6 biliyoone ale woxi hasiisanno gede xawisino.
Ikkollana, attamote waagi lexxonna gobbaydi woxu soorro anje xaaddinota buuxisino. Wodiidi qoqqowi mootimma xawinsoonni qarrubba hajo la’annonsa bissanni ledo ikkatenni furcho kalaqate loossanni nootanna noo woxu wolqanni maxaaffa attamisiisate looso hanaffinota xawisino. Aantete haaro rosu amanyoote hanafisiisate 90 kumi ale rosiisaanora qajeelsha aate mixi`noonni.
Bakkalcho Maaja 28 / 2014
