Abbebech Maatewoos
Addis Ababa:- Gobboomu amaalete komishiine Wodiidi galchimi Itophiy daga qoqqowi massagaano ledo Bonga quchumira tenne lamalara hasaawa assitino.
Wodiidi Galchimi Itophiy Daga Qoqqowi Laynki pirezidaantichi Dr Negaash Wageeshsho; gobbate Jireenya ada assate qara ikkitino gobboomunna qoqqowu badooshshubba ruukkisatenna sumiimme kalaqate babbaxxitino dagoomu kifillanna mootimmate ledo noonke xaadooshshe woyyeessate gobboomu amaale woowanchote yiino.
Ammanamooshshe gotti assatenna hasaawunniha polotiku bude lossate, sufino keere abbate kaajjadonna adhamooshshu noose mootimma gobbate giddo mittimmatenni uurrisate badooshshubba keeraanchonna seeritte doogonni tirate dimokiraasetenna polotiku budi reekko dandiisiisate; latishsha ollohatenna geino keere buuxisate woowancho hajooti yaanni coyi’rino.
Mootimma keerehonna sumuu yaate dandiisiissannose loossa babbaxxino garinni gumultanni afantanno. Lawishshahono, gobboomu amaalete komishiine uurrisatenni loosu giddora e’ino yiino. Qoqqowinke daganna mootimma sufino keeri buuxamanno gedenna Itophiyu mittimma agarantanno yawo wo’ma murci’raanchimmanni fulate qixxaabbinota Dr Injiiner Negaashshi Waageeshsho xawisino.
Gobboomu amaalete komishiine loosi injaanno gede hasiissanno irko aatenna komishiinete ledo mitteenni loosate qoqqowu mootimma qinaabbe loossannota Laynki pirezidaantchi buuxisino.‘’Gobboomu amaalete komishiinerooti luphiima ogeeyye uynoonninsata bayi’rra dhaggete yawo suwino wodanninni, ikkado massagaanchimmanni mallaadiweelo guma abbitinannita ammanneemmo’’ yaanniiti xawisinohu.
‘’Doogo mageeshshi geeshshano guffu’nero hedo’nenni miliqqi yitinoonte eeggatena yaatenni; gobbanke keerinna sumuu yaate barri rahanno’’ yaanni Laynki pirezidaantichi coyi`rinota qoqqowu komunikeeshiine fushshitino mashalaqqe leellishshanno.
Bakkalcho Maaja 28 / 2014
