Amsaalu Felleqe
Addis Ababa:- IFDR Mootimma gobbate hegeraamu keeri sufanno gede yaatenni HWHT ledo assitannoha keeru hasaawa qorophotenni amada hasiissannota albihu mashalaqqetenna keeru ogeessinna dipilomaatichi kalaa Belay Gebretsaadiq egensiisi. Kalaa Belay Gebretsaadiq Itophiyu pireesete uurrinshara xawisino garinni; mootimma baxxinohunni Aliyye gobbanke qooxeessira hegeraamu keeri hee’ranno gede assitanni noo
wo’naalshi naandanniho. Ikkollana, HWHT gaamo gobbaydi wolquwanni xiiwantanni yanna baala hedo soorrate harinsho noo daafira mootimma HWHT gaamo ledo assitanno hasaawa qorophotenni amada hasiissannota huwachishino.
‘’Gobbasi daafira hedanno manchi gede olu wo’munni wo’ma uurreenna wo’manti daga keerunni heedhanno gede luphiima hasatto nooe’’ yiinohu kalaa Belay; HWHT gaamo qarrubba tidhantanno gede hasaawa dandiitanni gobba roorenkanni qarru giddo tugansa dhagge habbannokki assoote ikkinota coyi’rino.
‘’Hasaawa hoogatenni lowori hoonganniri no. Mannu lubbo danotenni ba’ino; miinjunna jajjuno lowo garinni gawajjamino; mannommate aana iillino qarrino shotu garinni dila’nanniho’’ yiinohu Dipilomaatichu Belay; olu korkaatinni gobbate aana iillanni noo kisaaranna kalaqamino qarrinni roorenkanni gawajjantinoti daga ikkasenni hajo keeratunni tidhantanno gede mootimma assitanni noo wo’naalshi naandanniha ikkinota kulino.
Bakkalcho Maaja 28 / 2014
