Addisu Adoola
Hawaasa:- Lokka Abbaayyu Woradi giddo hala’lado investimentete injo noo gede woradunnihu qaru gashshaanchi egensiisi.
Woradi Qaru Gashshaanchi Kalaa Mesfin Melkaamu Itophiyu Pireesete Uurrinsha ledo noosi keeshshonni coyi’rino garinni; woradu giddo duuchu handaarinni hala’lado investimentete injo noo gede xawisino.
Woradu giddo investe assa hasi’rannohura noo injubba mereerinnino goombillu saada, diidu, qulxu’me, irshu baatto, gorsu loosi, bununna labbano hala’lado injo noohura handaarunni bobbahate hasattonna dhuku noonsari baalu worada toyaatte la’anno gede koysino; qaru gashshaachi.
Lokka Abbaayyu Woradira investe assara hasi’re daannoha woradu gashshooti anga fane haa’ransara qixxaawinoho yaannohu qaru gashshaanchi Kalaa Mesfiin Melkaamu; xaa geeshshano woradu giddo mannunni amadantinokkiti hala’lado fano baatto no; tini latinsiro haammatu wedellirano jawa loosu kaayyo kalaqa dandiitannota lede huwachishino.
Lokka Abbaayyu Woradira giddo xaa yannara 16 ikkitanno investerooti addi addi handaarinni bobbakke loossanni afantannotano xawisino. IFDR Xaphoomu Ministirchi Dr Abiy Ahmedi, assino “Amme Gobbanke Ha’nona” woxarattonni dayno Diyaaspoori woradu giddo addi addi handaarinni investe assate fajjo xa’mi’ranni daanni noohu batinyu manni noo gedeno Kalaa Mesfin lede qummi assino.
Konne worada doodhite dagganno investerootira hasiissanno injo kalaqate ga’labbo agarsiisate; safote latishshinna wole hasiisanno shiqotenna lawannori aana woradu hala’ladunni loosanni no yiinohu gashshaanchu; hasattonna dhuku noonsa investerooti baalu woradu giddo noota investimentete injo horonsidhanno gede duure woxaratto shiqishino.
Kalaa Mesfin amadisiiseno, kuri investimentubbanni woradu gede eo afi’nanni. Saeno qarqaru latishshi aana investeroota halantanno gede assatenni afi’nanni eo gobbaanni addi addi safote latishshubba aana irko assa dandiitanno kaayyo noo daafira halamme loonsanni hee’noommo yiino.
Bakkalcho Maaja 28 / 2014
