Abrahaam Saamueel
Addis Ababa:- Galchimi Afiriki ragaani hegersino keerinna latishshu seyoo dadda`lite galtino dagara kaa`lanoha ikkinota anfe loosunni leellisha hasiissannonke yite Pirezidaantitte Sahileworqe Zawudeti coyidhino.
Itophiyu albi wari massagaano massaggannohunna Itophiyahonna ‘IGAD’ ragaanni keerunna hegersino latishshi aana millimilli yitanno foreme faajjetenni hanaffino. Tenne foreme aana afantinoti Pirezidaantitte Sahileworqe Zawude;, Itophiyahonna babbaxxitino gobbuwara xaaddino gaancenna olu dadda`lite galtino dagooma qara gede gawajjinota kultino.
Ikkinohura, dadda`lite galtino daga keeru batiranno gedenna dagate latishshi xa`mora dawaro aate baqqi yine beeqqaano ikka hasiissannonke yitino. Looso faajjetenni hanaffinoti foreme hasiissanno yannara xintamase qummi assite, Itophiyu umosi dandee uurranno gedenna ‘IGAD’ ragaanninna Afirikaho hegersino keere abbate jawu qeechi noosita coydhino.
Konni albaanni agadhannonke looso loosa hoogankenni jawa gawajjo iillitinonke yitinoti Pirezidaantitte; tenne yannara mootimma, dancha fajjo uytanno uurrinshanna dadda`lite galtino daga beeqqaano ikkitannohu baalanka hanqqafino keerenna latishshu wo`naalsha assanni noo yitino.
‘IGAD’ gobbuwara noota hobbaatete bidhatto harunsite daggannota moollenna latishshu loosi loosamannokki gede rakkeessannohura dawaro aate tini foreme istiraateeje saffe loosa hasiissannota qummi assitino. Konninni, Itophiyunna ‘IGAD’ ragi gaancetenna olunni keere fulanno gede dandisiisate foreme istiraateeje saffe miilla ikkitino gobbuwanna mootimma ledo halante illachiishshe loosa hasissannota xa`mitino.
Keerunna latishshu widoonni loossanno uurrinsha ledo halantine loossinanni gede qaagiiseemma`ne yitinoti Pirezidaantitte; mootimma tenne foremera hasiissannoha baala irko assitannota coydhino. Itophiyu hasi`rannoha hegerisno keere halaalaancho assate oosonna wedellu mimmitu ledo anga amammadante ka`uro shiima yanna giddo hegersino keere abba dandiinannita Pirezidaantitte qummeessitino.
‘Entrepreneurial Forum For Peace and Development’ Qaru Loosu Gumulsiisaanchinna Boordete Gambisaancho ikkinohu Dr Mulaatu Teshoome; sa`u dirrara Itophiyaho kalaqantino qarrubbanni dadda`lite galtino daga jawa gede gawajjantinota kulino.
Dadda`lite galtino daga gamba assatenni foreme Itophiyahonna Itophiyu ragaanni noo gobbuwara noo gaance keerunni tidhantannohanna gaance kalaqantannokki gede assate gargarate, kalaqantu gedensaanni wiinamunni gawajjantinore wirro gatamarate looso loosatenni miinjunna dagoomittete looso loosatenni albillicho haranno gede illachiisha hasiissannonke yitino.
Foremete xaphoomu songo murrichi Kalaa Belayneh Kinde; xa nooti gobboomu ikkito dadda`lite galtino daga albinni roore gawajjitino. Konnira, keereho baalunku agaraancho ikkanno gede gadadu noosi yiino.
Ikkinohura, mootimmanna daga gobbate keerunna ga`labbo batidhanno gede hattono latishshu buuxamanno gede assinanni hee`noonni wo`naalsha dadda`lite galtino dagoomi aana noo qarra tirate murcidhe ka”a noonsata coyi`rino.
Bakkalcho Maaja 28 / 2014
