Abrahaam Saamueel
Addis Ababa:- Mootimma giwirinnu handaarira illacha tugge loossino loosinni shiimu diri giddo konni handaarinni duuchu dani doogonni kullanni guma maareekkisiisa dandiitinota Pilaanete Ministeere xawissino.
Pilaanete Ministercho Dr Fitsumi Asaffiti Itophiyu Pireesete Uurrinhsa tenne lamalara qixxeessitino lamalkita “Itophiyu Dafira” yitannota fotote reqecconna paanalete hasaawi aana xawissino garinni; giwirinnu handaari aana assinanniti xibbuunni 1% nafa investe assiniro buxima ajishate jawa qeecha afidhino. Giwirinnu aana assinanni investimentete irko hasi`nannihunni aleenni guma abbannoha ikkasinni mootimma illachiishshe loossanni afantanno. Mite mite foonqe nafa heedhurono xe`nesinni nafa saiha sasenna shoole diro loosantino loossanni duuchu daninni xawinsanni gumi leellino.
Mootimma giwirinna yanneessatenni laalchunna laalchimma lexxitanno gede assate Tiraakitereno hattono shiimmaadda giwirinnu uduunne gobbanni qaraxiweello e`anno gede assatenni mekaanayzeeshinete uynoonni illachi mitto ikkinota huwachishinoti Dr Fitsumi Asaffiti; tenne yannara gobbate deerrinni loonsanni hee`noonni giwirinnu loossa uduunni loosu aana hosanni nootanna xibbunni 30 anga ikkannoha irshanna baattono yannichu giwirinnu uduunnichinni woy Tiraakteretenni loonsoonnita Mereerima Istaatikisete Ajense mashalaqqe xawissannota huwachishino. 6 kumi ali Tiraaktere no; saiha shoolu diri yanna wirro buunxummoro, giwirinnu handaari irshu uduunni shiqqonni hanafe jawa soorro noota buuxissino.
Ledoteno, gorsu latishshira waa eessate hosanno uduunni (paampe), wolootu hasiissanno uduunni giwirinna irkissanno gede assinanni hee`noonnita kultino. Konne giwirinnu uduunne investe assa, woxe duna, jajjabba gorsu ijaara hasiissukkinni jajjabba way lagga horoonsi`ne shotu garinni waa goshshoonshe hala`lado latishsha harisa jawa gede dagate heeshsho soorritanno. Loonsanni hee`noonnihuno konne loosooti yitino.
Tenne yannara arrishshote caabbichinni owaante uytannori 20 kumi ali paampe horote aana hossinota Dr Fitsumi kultino. Kuni uduunni kalaqamu wolqanni horo aanno gede assatenni elektirikete caabbichi wolqa gatisa dandiinoonni. Baatto miinju bue uduunne assatenni mootimma assitino millimillonnni baatto loosidhe galtino daga baattote annanna ama ikkansa kultanno taje heedhannonsa gede assinoonni. Baatto loosidhe galtino daga taje baankete amadiisse woxe liqii`ra dandiitanno kaayyo kalanqoonnita qummeessitino. Qasiisote loosonna baatto qottisate hayyo harunsatenni, giwirinnu looso loonsanni hee`noonnita sa`u lamala geeshsha noo mashalaqqenni Oromote qoqqowi xibbuunni 75 anga qasiiso qottisate hayyo harunse loosa dandiinota kultino.
Togoo dani millimillo laalchunna laalchimmate lophora jawa soorro abbitannota xawissino. Miinju tantano reekko qinaabbanno gede assate mereeroho loossanno miinju tantano soorro noota qummi assitino. Diru dirunkunni loonsanni loossa seedu dirira amandoonni mixora kaima ikkannota xawissino.
Bakkalcho Maaja 28 / 2014
