Abbebech Maatewoos
Addis Ababa:- Tenne xawinsoonnihu Itophiyu Hiwot Biraanete huuccatto mini qixxeessaanchimmanni “Haanja Haruma Baalante Lophora” yaanno massagote qaalinni Kuyyowaata ilaali aana haqqete mu’ro kaashsho kaasate amuraate harinsi yannaraati.
Amuraatu aana leellinohu Sidaamu dagoomu qoqqowi mootimma Laynki pirezidaantenna Rosu biiro sooreessi kalaa Beyyene Baraasi; IFDR Xaphoomu ministirchi Abiy Ahmedihunni hanafaminohu haanju harumi loosi qoqqowoho baalante qooxeessubbara kaajje sufinota xawisino.
Hiwot Biraanete huuccatto mini qoqqowinkera dagoomittenna latishshu loossanni beeqqanni keeshshinota xawisinohu biirote sooreessi; kuni loosi kaajje sufanno gede xa’mino.
Hawaasi quchumi gashshooti kantiiwi kaalaanchu piroofeeserchi Tseggaye Tuke isi widoonni xawisino garinni; mulqantino qooxeessubba haqqete kaashshinni diwate loonsanni hee’noonni loosi jawaachishannoha ikkinota xawisino.
Loosu baxxinohunnino, Hawaasa aantanno ilamara biifadonna hee’rate injaanno quchuma tareessate baalanti daga dhaggete xamamaanchimmanni gatate haqqu kaashsho kaasatenninna awuutatenni qeechansa fula noonsatano kantiiwu huwachishino.
Konni ragaanni Hawaasi Hiwot Biraanete huccattote mine labbino amma’note uurrinshuwanni assinanniti haqqu kaashsho kaasate loossa mageeshshi geeshsha amma’note uurrinshuwa quchumu biinfillira qoteho uurransa leellishannoha ikkinota Kantiiwu coyi’rino.
Qotehono amma’note uurrinshuwa gobbate keerira huuccatenni gobbanke xa noo ikkitonni fulte woyyitino doogora qaaffanno assate widoonnino qeechinsa luphiima ikkinota kantiiwu lede xawisino.
Huuccattote mini pirezidaantichi paaster Senbeto Bashe isi widoonni; huuccattote mini tayxehu haqqu kaashsho kaasate amuraatira 200 kume ale haqqu mu’ro qixxeessatenni baalanka beeqqisiisino garinni haanja haruma worate looso loossanni afantannotano xawisino.
Itophiyu Hiwet Biraanete huuccattote mini loosu massagaano boorde Paaster Geetu Ayyaalew isi widoonni; huuccattote mini ayyaanaame loossara ledotenni latishshu loossara beeqqatenni hala’lado looso loosate aana afamanno yiino. Paasterchu ledeno huuccattote mini Kaaliiqi massagaanote egenno aanno gede huuccatenni gobbaanni Itophiyu xaa yannara noo ikkito soorranteenna keerunna latishshu lawishsha ikkitanno gede jawaatte loosatenni qeechase fultanno yiino.
Qixxaawote aana beeqqitinoti huuccattote mini ammanaasine; dagoomu haqqu kaashsho kaasatenni calla ikkikkinni agaratenninna awuutatennino beeqqo assanno gedeno xa`mitino.
Bakkalcho Maaja 28 / 2014
