Qiddist Gezaheny
Addis Ababa:- HWHT massagaano Tigrayete daga wirro akkimalu qarri giddora eessate ‘’Sayikki Gaado’’ yite harissanno ola Tigrayete daga tiyyidhe giwa noonsa yino Tigrayete dimokraasete paarte adawunna hobbaatu hajubba sooreessi koloneel Fissiha G/Medihinihu.
Kolonel Fissiha Itophiyu Pireesete Uurrinsha ledo assino hasaawinni xawisanni; HWHT massagaano ‘’Sayikki Gaado’’ yite olu gaado harissanni afantanno. Kuni olaho massagannoha ikkiro gobbate baxxinohunni Tigrayete daga aana heedhanno xiiwo luphiimate. Koloneel Fissiha xawishshi garinni; keerunni ikkinnina olunni afi’nanni horo dino; olu mannu heeshsho, mannimmanna jiro itanno.
Latishshaho hosa hasiissannosiha dagate jajja olaho hosiisa jawa kisaaraati. Gobbate jironni hirroonni uduunnichinni gobbate safote latishshi gawajjamannoha ikkiro laashshaano wedelli lubbo ba’’anna mannimmansa xeanna kisaaru lowo geeshsha akkimalete.
Tigrayete daga qarra keeru doogonni tira dandiinanni gedeeti hasattonsa; ikkollana HWHT massagaano olunni tirreemmo yite baalunku wedelli qodha woy sharro karsama noonsa yaatenni olu gaado harissanni noota xawisinohu koloneel Fissiha; HWHT massagaano uminsa horo agarsiisi’rate sharrote aana beeqqinokkihu hiittoo horono diafi’ranno yaatenni tuqu xaadooshshuwaranna woradda dirrite kakkayishsha assitanninna gadachishshanni afantanno.
Olu Tigrayete dagara mitte kaa’lono diassanno; dagano keere hasidhanno; konni alba Dargetenna Eertiraho assinoonni olinni Tigrayete daga oosonsa kakkalate gobbaanni horonsidhino coy dino yaatenni huwachishino.
Tgrayete daga baaluri albaanni keere hasidhanno’’ yinohu koloneel Fissiha; HWHT dagate hasatto gobbaanni ‘’Sayikki Gaado’’ yite harissanni noohu olu kakkayishshi ledote gawajjo iillishannoha ikkasinni Tigrayete daga effidhe giwa noonsa yaatenni xawisino.
Keeru dirriro gawajjantinota safote latishshuwa baalanta dagate ledo halamme wirro gatamara dandiinanni yiinohu koloneelichu; galagalle olu giddora e’niro kayinni gattinori safote latishshuwa wo’munni wo’ma gawajjantara dandiitannota xawisino. HWHT gaamo keerunniwa higganno gede amma’note massagaano, gobbate geerri, egennaammunna woloottuno xiiwo assa noonsata lede huwachishino.
Bakkalcho Maaja 28 / 2014
