Abbebech Maatewoos
Addis Ababa:- Mootimmate tantano giddo heedhe dagate jiro raaqqanno massagaanonna loosaasine dicincineemmo yiino Sidaamu qoqqowi pirezidaantichi kalaa Desta Ledamo.
Kalaa Desta Sidaamu qoqqowi 2014 bejetete diri loosu jeefishshanna 2015 bejetete diri mixo keeno lainohunni uyno xawishshinni; gumulami bejetete dirinni laalchonna laalchimma lossate qoqqowu illacha tuge loosanni keeshshinota kayisino. Ikkollana, noo dhuki bikkinni ikkado laalcho afi’rino yaa dandiinannikkita qummi assino.
Aanteteno laalchonna laalchimma lossate qoqqowu sagaletenni umosi dandaatenni sae gobbate qeechasi fulanno gede gibrinnu handaara Tekinoloojetenni irkisate federaalete mootimma ledo gibrinnu eo afi’ra dandiinanni akati aana loosannota coyi’rino.
Kuri mereerinni roore anga ikkitannori babbaxxitino jajjabba rosu uurrinshuwanni maassantinore ikkansa xawisino. Loosu kaayyo kalaqo ledo amadisiisaminohunni mootimmate loosu minnara qaxarama ikkinnina looso kalaqa hasidhanno wedelli hooga mitto qarra ikkitinota qummi asse; konne laooshshe soorrate looso kalaqqanno wedella kalaqate qajeelsha uynoonnita kaysino.
Aantete qoqqowu mootimma illacha tugge loossanno handaarra mereerinni mittu moora uurrisanna owaante uynanni harinsho taashsha ikkinota coyi’rino. Mootimmate tantano giddo heedhe dagate jajja raaqqanno loosaasine loosinsa aaninni kayisatenni looso hasidhannore insa baycho riqimbeemmo; togoo assoote loossanno massagaanonna loosaasine aana adhinanniti seeru qaafo kaajjite suffanno yiino.
Konni gobbaanni qoqqowu eo lossatenni afi’nanni eo suuqotenna billaallinsikkinni horonsi’ne qoqqowunnita safote laytishshi xa’mo qolate ammanamatenna jawaantetenni loonsanni yiino.
Bakkalcho Maaja 28 / 2014
