Qiddist Gezaheny
Addis Ababa:- Soojjaati Itophiyi widoonni luuxxe eate wo’naalino Alshebaabi hunatenni murante gattino cancishaano gaamo miilla co’isate qaafo adhinanni hee’noonnita gobbate gargarooshshu wolqa bobbaaso sooreessinna yannate adawu komaand poste qineessaanchi Meejer Jeneraal Tesfaye Ayyaalewuhu xawisi.
Itophiyu diinna Aliyye gobbate kifileranna galchimi Itophiyira adhinoonnita seera agarsiisate qaafo harunse keeru hala’linoha lawannansa tenne lamala giddo soojjaati Itophiyira gano iillishate wo’naalsha assitinota coyi’rino.
Alshabaabi hunaano wolqa Somaalete qoqqowira shiimaadda Onte furchote qooxeessubbara yaano; Yedi, Atto, Albirde, Woqashonna Ferferi yinanni qoooxeessubbara gano iillishate wo’naalturono adawu wolqanni wo’munni wo’ma diigamansa kulloonni.
Somaalete baxxitino wolqanna massagaano cancishaano gaamo diigama aana noonsa qeechi luphiima ikkasi xawisino. Alshebaabi qodhaano mittu qooxeessira calla maaxantinoha ikkirono adawu wolqa doyissite amadatenni 100 ale cancishaano gaamo miilla aana qaafo adhitino yino.
Gaamo hunote assootinsara horonsidhanni keeshshitino gongo’mishamaano wo’munni wo’ma gawajjantinota qummi asse; murante gattinore cancishaano gaamo miilla coisate qaafo adhinanni hee’noonnita xawisino.
Gaamote aana adhinoonni qaafonni Matariyeessa, RPG nna wolootano jajjabba gaamote uduunne hattono barraho horonsidhannoha olu uduunne qafandoonni. Qooxeessaho uurrinsoonni komaand pooste gobbate qaccenna qarqara agartanni noota qummi assinohu Meejer Jeneraal
Tesfaye; Somaalete qoqqowi daga gobbate gargarooshshu olantonna qoqqowu baxxitino wolqara luphi yitino buqqeetenna sinqu irko assitanni afantannota xawisino. Xaa yannara gobbate gargrarooshshu olantonna waaxote adawu wolqa wo’munni wo’ma qooxeessa amaddinota coyi’rino.
Itophiyu qacce qarqara siyatate wo’naaltanno wolqa aana wo’munni wo’ma qaafo adhate gobbate gargarooshshu olantonna somaalete qoqqowi baxxitino wolqa lede adawu komaand poste qixxaabbinore ikkansa qummi assino.
Bakkalcho Maaja 21/ 2014
