– Mootimmate Komunikeeshiine Owaante
Abbebech Maatewoos
“Haqqu kaashshi kaasamannokki gede kakkayissanno wolquwa haaroo`mate kofatto wonshitinoonte yitino wolquwannni baxxite dileeltanno” yaatenni mootimmate komunikeeshiine owaante ministire Dr Leggese Tullu xawisi.
Ministirchu uyno xawishshinni mite mite daga haqqu kaashsho kaasate hajo iillitino gawajjo ledo amadisiisatenni shiqishshanno hedonna gufisate assitannoti adhamooshshu noosekkita ikkase coyi`rino. “Mitte anganni keerenke agarranni woletenni kayinni Jireenya buuxisiisatenna dagate heeshsho woyyeessate kaajjine loonseemmo” yiino.
“Harumanke ilamankera; ilamate loonso; Itophiyaho kaanso” yaanno massagote qaalinni 4ki doycho haanju harumira haqqe kaasate amuraati sa`u lamalara faajjetenni hananfoonnita qaanganni.
Tini haqqete kaashsho kaasate millimillo Itophiyu keerese agarsiissanni sufattote latishshi buuxamara assitanno wo`naalsha leellishannoha ikkasinni; baalanti bissa loosoho hasiissannota baajeete gaamatenninna irko gamba assatenni assinanni hee`noonni millimillo kaajjishshe suffanno gede Dr Leggese huwachishino.
Dagoomu fayyimmate mitiimma iillishshanno taraawo gargadhanni haanja haruma woranno gedeno xa`mino. Haanju harumi sufattote Jireenyi kaimaati yiinohu ministirchu; tayxe dirinni 7 biliyoone ale haqqu kaashsho kaasatenni Itophiya uddisiisate amandoommo mixo gumaame assate baalunku halama noosita xawisino.
Qotehono wolqa afidhinokki mannootira minna haaroonsatenni, haaruudde minna loosatenni, Itophiyaho kaasatenninna laalchonna laalchimma lossatenni qansootu heeshsho woyyeessate illachunni loonsannitano xawisino.
Aja dume addi addi doogonni suwisatenni keerunna gobbate mootimma ikkadimma kaajjishshanno loossa loosantannota coyi`rino. Mittu qooxeessi woloota qooxeessubbara gano iillitinonsa daga kaa`late assanni noo irko kaajjishe suffanno gedeno xa`mino.
Wole widoonni Saudinni higgannore lainohunni mootimma Badheessa 21/2014M.D hanaffe Ella 21/2014M.D geeshsha 43 kumi 61 qansooti gobbansara higganno gede assitinota ministirchu egensiisino. Gobbansa higgino qansooti tiia dhaawatenninna addi addi kaa`lo afidhanno gede assatenni maatensa ledo karsantanno gede assinanni hee`noonnitano xawisino.
Xaa geeshsha noo gumulshinni gobbansara higa hasiissannonsa qansootinni xibbuunni 42 anga ikkitannoti higginoha ikkanna aantanno agannarano kuni loosi kaajje sufannota coyi`rino.
Qooxeessubbate higgino qansooti umonsa dandiitanno gedenna uminsa looso kalaqqe woyyitino heeshsho massagganno gede maate, halamaano uurrinshuwanna qooxeessu gashshooti uminsa qeecha fultanno gede mootimma huwachishshino.
Wole widoonni xaano addi addi seerimale doogonni babbaxxitino gobbuwa eate millissanno mannoota seejjatenni hanafe hajo la`annonsa bissa babbaxxitino qaafo adhitanno gedeno mootimma duudhe huwachishshino.
Bakkalcho Maaja 21/ 2014
