Qiddist Gezaheny
Addis Ababa:- Fulote daddali aana bobbakkino Interpirayizooti xaaddannonsata eote shiqisho anje gatisate 25 miliyoone doolaare qixxeessinoonnita Itophiyu Interpirayizete latishshi qaru dayrektere kalaa Birru Woldehu egensiisi. Itophiyu Interpirayizete latishshi 2014 bejetete diri gumulonna 2015 mixo aana handaaru qoqqowu biironna hajo la’annonsa bissa ledo hasaawa harisino.
Hasaawu aana qaru dayirekterchi kalaa Birru Woldehu coyiranni; bejetete dirinni 4.1 Biliyoone ali birrinni dikkote mittoo’ma kalaqa dandiinoonniha ikkanna fulote daddalinnini 31.4 Miliyoone doolaare mixotenni xibbuunni 99 anga e’’o afi’noonni.
Koroonunna olu giddoonni sa’ne konne guma borreessiisa dandaa aantete handaaraho noonke dhuka leellishshannote yinohu kalaa Birru; industurra deerransa agadhitinorenna islancho laalcho laashshitanno gede loonsanni hee’noonnita qummi asse; gobba giddo laalcho horonsirate widoonni seerunna biddissunni irkisamino looso loosa agarantanno yino.
Interpirayizootu heewisamaanchimmanna horonsiraanchimma lossatenna kalqoomu dikkora beeqqaano ikkitanno gede assate addi addi kaayyo injeessinanni hee’noonnita xawisinohu qaru dayirekterchi; gumulsiissannorinna hajo la’annonsa bissa qinaabbe loosatenni yawonsa garunni fultanno gede qummi assino.
Haaru bejetete dirinni interpirayozootu ikkadimmansanni heewisante baraadhannota qaagiisse; konnira Interpirayizootu xaanni hanaffe qixxaawo assitanno gede xa’mino. Bejetete dirinni 1.4 Biliyoone birra ikkitannota looso harinsanni liqoonna 1.5 Biliyoone birri kapitaalete uduunnu womaashsha laashshaano Interpirayizootira iillisha dandiinoonnita coyi’rino.
Ikkollana Interpirayizootu higge higge shiqqannota luphiima womaashshu shiqisho anje tirate aantete baxxino illacha tunge loosa hasiissanno yinohu kalaa Birru; safote latishsha wonshinoonnire laashshinanni base shiqishateno xiinxallotenni irkisamino looso loonsanni hee’noonnita qummi assino.
Bakkalcho Maaja 21/ 2014
