Yaareed Geetaachew
Hawaasa:- Albisaancho Hawaasi Rosiisaanote Kolleejje dipiloomu deerrinni qajeelsitinore 24ki doychoranna jeefote 700 rosiisaano tayxe dirinni maassiissinota kolleejjete Diine Birhaanu Dessaalenyi egensiisino. Dipiloomu deerrinni 2014M.D jeefote yannara maassiinsoonniri giddonni 158 meento ikkinotano baxxinohunni Itophiyu pireesete uurrinshara xawisino.
Konni gedensaanni Kolleejje dipiloomu deerrinni qajeelsa uurrissannotanna digiretenni qajeelsatenni maassiissanno yiinohu Koolleejjete Diinichu; dipiloomu deerrinni qajeelsha aa uurrinsannihunna wo’munni wo’ma digiretenni qajeelsinannihu gobboomu deerrinni qixxeessinoonnihu rosu loossa harinsanni kaarti garinni ikkinota xawisino.
Rosu handaara woyyeessate amandoonni mixo garinni 1ki–8ki kifile geeshsha rosiissannori digiretenni maassantinore ikka noonsa yaannohunni hananfoonni raga ikkinota huwachishinohu Kolleejjete Diinichi Birhaanu; balaxote rosi deerrinni rosiissannori kayinni dipiloomu rosiisaano ikkitannotano kulino.
Konni albaanni dipiloomunni maassante rosiissanni keeshshitino rosiisaano kayinni hawadi yannarano ikko hasiisanno garinni Kolleejjete rosonsa harunsitanni deerransa woyyeessidhanno gede assinannitano amadisiise xawisino.
Tayxe dirinnino 625 digirete deerrinni qajeeltanno rosiisaano 11 rosu gollanni haa’ne qajeelsinanni hee’noonniha ikkanna 190 balaxote umi dirimi rosi deerrinni rosiisannoreno haa’ne qajeelsinanni hee’noonni yiino.
Rosiisanote qajeelshi isilanchimma woyyeessateno balanxe woyyeessanna qajeelsitannore Kolleejjete rosiisaano dhuka lossatenna deerransa lossidhanno gede hala’lado looso loonsoonniha ikkanna xaa yannarano 39 rosiisaano sayikki digirensa harunsitanni afantannota coyi’rino.
Wole widoonnino qajeelsha tekinolojetenni irkisatenni qajeeltanno rosaano egennonna dhuka lossate ragaanni woyyaambe leeltinotano hattonni. Hawaasi rosiisaanote kolleejje su’minni kaphu rosu tajubba qaxaramate assoote gargarateno rosiisaano gaamate hasidhanno bissa balaxxe uurrinshatenni halaalaancho rosu taje ikkase buuxxanni gaantanno gede assinannitano lede huwachishino.
Bakkalcho Maaja 21/ 2014
