Abbebech Maatewoos
Hawaasa:- Sidaamu qoqqowira fayyimmate owaante iillo buuxisiisate mootimma illacha uyte loossanni noota xawinsi.
Qoqqowo Bursi woradira 63 miliyoone ale ikkitino woxu fulonni loosante dagoomaho owaantete fano ikkitinoti Bursi umi deerri hospitaale maassiise faninohu qoqqowu pirezidaantichi Kalaa Desata Ledamohu coyi`rino garinni; qooxeessu daga luphiima ikkitino fayyimmate owaante iillo qarri noosenkanni.
Sa`u lame dirrara qoqqowu mootimma adhitino kaajjado murciraanchimmanni Bursi umi deerri hospitaale ijaarsha rahotenni jeefisse hasiisanno uduunne wonshatenni owaantete fano ikkanno gede assitinota xawisino.
Qoqqowu mootimma fayyimmate owaante iillo buuxisate dagate qarra deerru deerrunkunni tirate loossanni noota coyi`rinohu pirezidaantichu; hospitaale deerrase agartinota ikkasenni isilalchimma noose owaante dagoomaho uytanno yiino.
Pirezidaantichu woradunna qooxeessu daga daggino kaayyo uminsa jiro gede garunni horonsidhanno gedenna latishshaho assitanni keeshshitino beeqqo kaajjishshe suffanno gede xa`mino.
Sidaamu qoqqowi fayyimmate biiro sooreette Dr Selaamaawit Mangashiti ise widoonni; fayyimmate owaante iillo buuxisiisate taalo ikkinonna isilanchimma noose owaante aate illachunni loonsanni hee`noonni yitino.
Woradaho 63 miliyoone ale ikkino woxu fulonni loonse uduunne wonshinoonniti Bursi umi deerri hospitaale ikkado ogeeyye gaammeennase looso hanaffanno gede assinoonnitano coyidhino. Hospitaale isilanchimmase agartino owaante aatenni dagooma owaattanno gede harunso assinannitano xawissino.
Sooreettete xawishshi garinni; hospitaalete loosi hanafasi qoqqowoho noota hospitaalete kiiro ledatenni fayyimmate uurrinshuwa lossatennino aleenni qooxeessu teesaano owaante hasidhanna iillitannonsa xiiwonna daafuro ajishanno. Hospitaale 100 kume ale qooxeessu dagoomira owaante uytannota xawinsoonni.
Sidaamu qoqqowira Bursi woradira maassiinsoonnita lede 15 umi deerri, 5 xaphoomanna 1 Riferaale hospitaalla afantannota Qoqqowu Fayyimmate Biironni afi’noonni mashalaqqe leellishshanno. Maassote amanyooti aana qoqqowu luphiima mootimmate loosu sooreeyye, gobbate geerri, amma`note annuwinna wolootano hajo la`annonsa bissa leeltino.
Bakkalcho Maaja 21/ 2014
