Amsaalu Felleqe
Addis Ababa:- Itophiyu pireesete uurrinsha qixxeessitinota lamalki “Itophiyu Daafira’’ yaamantanno fotote reqecconna paanaalete hasaawi bare Adaamu quchumira bero fannoonni.
Barete ka’ino qara hedonni, Itophiyu 2003M.D-2010M.D geeshsha maareekkisiissino miinji tantanotenni reekkame massagaminokkiha ikkasinni hegeraamo ikka dandiinokkita IFDR Pilaanetenna Latishshu ministiritte Dr Fitsum Asaffiti xawissino.
Lamalkihu “Itophiyu Daafira’’ yaamantanno fotote reqecconna paanaalete hasaawa Adaamu quchumira fanni yannara hawaawu borro shiqishshinoti Dr Fitsum; Itophiyu miinji 2003M.D—2010M.D geeshsha noo dirra giddo mereerimunni 95% lophino.
Ikkollana, tini lopho tantanotenni kaajjinshe reekkatenni massangoonnikki daafiranna mootimmate safote latishshuwano liqootenni loonsanni keeshshinoonnita ikkasenni gobba salehonna qarraho tugatennino sae sufinokki miinja ikkino yitino.
Konninni rosicho adhatennino gobbate soorro daggu kawa miinja tantanotenni reekkine massagate hala’lado looso loonsoonnita coyidhinoti Dr Fitsum; konni garinni massaga dandiiniro gobbanniha hegeraamo miinja kalaqa dandiinannita huwachishshino.
Babbaxxitino gobbanke qoqqowubba quchummara harinsanni hee’noonnihunna Itophiyu pireesete uurrinsha qixxeessitannoti ‘’Itophiyu Daafira’’ yaamantannoti fotote reqecconna paanaalete hasaawi bare konni albaannino lee doychora babbaxxitino gobboomitte hajubba aana haja la’annonsa bissa barete leelte hasaawa assitinoha ikkanna Adaamaho harinsanni bare kayinni lamalki yannaraati.
“Itophiyu Qeeltanni Sa’anno’’ yitanno massagote hedonni Adaamaho massanganni bare miinju aana illachishshinote. ‘’Miinju tantano reekko Itophiyu daafira’’ yitanno kaimu hedo aana illachishshino bare aana Federaaletenna Oromiyu qoqqowi mootimma luphiima loosu massagaano, miinju fullahaano, investerootu hattono ayirrado woshshatto assinoonninsa wosinna beeqqitanni afantanno.
Fotote reqeccono 1950M.D hanafe gobbankera babbaxxitino yannara sa’inota poletiku ikkitubba, dhaggete guffanni ka’inota dagate xa’muwanna gobbate ayirrinyira baantoonni kakkalonna Itophiyu daa’’attote jiro ledo amadisiisantinota qara qara gobboomitte ikkitubba leellishshannote.
Adaamu quchuminna qooxeessu dagoomino tenne fotote reqecco Hayle Riizortera leellitanni daa’’attanni afantanno. ‘’Itophiyu Daafira’’ yaamantanno bare konni albaanni JigJigaho, DirreDawaho, Hararete, Hawaasa, Arba Mincetenna Jimmu quchummara harinsoonniti qaangannite.
Bakkalcho Maaja 21/ 2014
