Addisu Adoola
Hawaasa:- Rosino qansichi gobba soorrannota Sidaamu Qoqqowi Mootimma Pirezidaantichi Kalaa Dest Ledamohu coy’ri.
Sidaamu Qoqqowi Mootimma Rosu Biiro “Sidaamu Rosu Haaroonsha” yaanno uminni qixxeessitino dagate millimillo aana afame assini fanote hasaawinni, “rosino qansichi gobba soorranno” yiino. Tennerano lawishshu gede Jarmanenna Jaappaane kaysino.
Kuri gobbuwa addi addi Oli korkaatinni diigantino gobba ikkitino gede dhaggetenni kullanni yiinohu pirezidaantichu, techo kayinni kalqete afantanno macca gobbuwa mereerinni jirotennino ikko egennotenni heewisantannonna macca gobbuwa ikkitinota qummeessino. Kunino ikkinohu qansootinsa buqqee horonsidhe ikkino gede kullannita huwachishino.
Rosu mittu mittunku heeshsho woyyeessateno ikko dagate gede assinanni heewora darga gantannonna gafa affino ilama ikkine sharramatenna; addi addi daga ledo hee’rannonke qeechi beeqqo ikkadimmatenni amande leellatenna ilamankeno heewisantanno ilama assate rosino qansichi lowo geeshsha hasiisannonke yiino. Pirezidaanchu Kalaa Desta yaanno garinni Sidaamu Daga techo la’neemmo tantano deerra iillitinohu harancho yanna kawa kalaqantino rossino ilamanni ikkinota qummeessino.
Albaanni sa’ino ilama seeda yannara assitino sharro qaraarote; ikkollanna kayinni hansoonni guma abbitukkinni sa’ino yiinohu pirezidaantichu, hasi’noonni darga iillinoonnihunna guma afi’noonnihu kayinni biiretenni sharrama hananfi woyteeti; Sidaamaho rossino ilama kalaqantu gedensaanni rossino hayyonniiti. Konninni kalqete heewisamaancho daga ikka dandiinannuhu ronsirooti yiino.
Tennera Sidaamu Daga heewisamaancho ikkitannoha ikkiro ikkado roso qansichu afi’ra hasiissannohura baalunku dhukinke fajji deerri rosu loosira anganke hiixantono yiino. Sidaamu Qoqqowi Mootimma Lay/ Pirezidaantichinna Rosu Biiro Sooreessi Kalaa Bayyani Baraasihu isi widoonni, rosu kalqete fullanke dagganno gedenna kalqe techo la’neemmo gedeeta ikkitanno gede assino bayi’ra uduunnichooti yine adha dandiinannita qummeesse; gobbuwa lophitinohunna busulle dagginohu qansootansa rosiisse ikkadda assiteeti yiino.
Konni kaiminnino sai Shoolu diri kawa gobbankeha rosu bude haaroonsate amandoonni mixo jeefisate assinoonni sharronni gobbanke lophote widira higge hadhanni noota huwachishinohu Biirote Sooreessi, lophote dirima iillate qole rosu aana kawiichinni roorsine loosa hasiishshunnita ikkitanno yiino.
Kalaa Bayyani, Sidaamu Qoqqowi gedeno ikkiro saiha Shoole diro rosu aana illacha tunge loonsoonni kayinni baalanka rosu coyenke soorra dandaanno garinni loonsoommo yaate dandiinannikkita coy’rino. Jeefoteno Qoqqowunnihu Sooreessu, rosu loosi hala’lado ikkasi deerrinni baalunku halama hoongummoro mootimmate baajeettenni calla hasi’noonni guma abba dandiinannikkihura dagate millimillo battala ha’risa hasiissinota xawisino.
Dagate millimillo beeqqitino Dureeyyenna amma’note annuwi birrunni hanafe dhukinsa assi deerrinni rosu mine minate qaale e’inoha ikkanna wo’manti mootimmate loosu sooreeyyeno Mittu agani damoozansa rosu loosi’ra aate qaale e’ino.
Bakkalcho Maaja 14, 2014
