Abrahaam Saamueel
Arrishshote caabbichi baxxinohunni ‘Ultra-violet’ yinanni arrishshote caabbichi goginke aana uwanno woyte bisinke ‘Vaytaamin D’ yinannita laashshanno. Kunino umiseti balaxote harunso no. Mittu manchi arrishsho afi`re ikkadu garinni ‘Vaytaamine D’ laashshate keeraanchonna fayyo ikkitinoti afalenna mulu hee`ra hasiissannosi.
‘Vaytaamine D’ Horo Maati?
‘Vaytaamine D’ helleete giddo sagale daahantu gedensaanni kaalsiyeeme yinanni shiilo bisinke giddora e’anno gede kaa`litanno. Togo yaa vaytaamine bisinke giddo wole kaalsiyeeme giddonke hoogguro, kaalsiyeeme sagalete giddo nafa heedhuro e’ukkinni woy karsantukkinni shumatenna cilu ledo fultara dandiitanno. Kaalsiyeeme miqichohonna hinkote lophora lowo geeshsha hasiissannote.
Mittu qaaqqi giddo kaalsiyeemete shiilo anje heedhuro miqichu kaajjille hooganno; qoleno miqichu shokkara dandaanno; hinkono yannase agarte fultukkinni gattara hattono keeshshitara dandiitanno.
Qaaqquulle mamootinni kayinse Arrishote fushsha dandiinanni?
Qaaqquullu ilantuhunni 10 barrinni kayse Arrishshote fushsha dandiinanni. Hasiisiha ikkiro 5 barri gedensoonni fushsha dandiinanni. Konne assinannihu bisu dani baqqala ikkiro.Soodihunni 3-5 saate geeshsha noo yannara diilallo batidhannokki daafiranna Arrishshote bikkino bati’rannokkihura tenne yanna doorranni.
Qaaqquullu mitto barra me”e saate geeshsha Arrishsho iibbishi’ra hasiissannosa?
Duucha yannara qaaqquullu mitto barra 20-30 xiqqeessi geeshsha Arrishshote iibbishshidhuro ikkannonsa. Ikkollana, kuni goginsa dani garinni baxxanno. Lawishshaho, kolishshi’rino bisi gogi 30 xiqqeessi geeshsha hasiissannosiha ikkanno. Duumu bisu gogi 15 xiqqeessi geeshsha calla ikkasira dandaanno.
Qaaqquullu maate afa hasiissannonsahu Arrishshote afi`neemmohu qaru caabbicho ikkinnina iibbille dikkino. Konnira, dhaaddotenni Arrishsote caabbichi bisinsa aana ofolla noosi. Hincilaallote widoonni sa`ino Arrishsho ikkiro waagu dinoote. Dandiini deerri bikka haammatu bisu kifile Arrishshote caabbichira hosanno gede assa noonke.
Qorophote Doogo
Qaaqquullu Arrishsho iibbishidhanno yannara Vaaziliine woy buuro buura Arrishshote caabbichi bisu gogi giddora eannokki gede assanno daafira tenne qoropho assa noonke. Arrishshote qaaqquulle iibbinsheemmo yannara illennsanna labballu qaaqquullira nuxxalensa qooxxeessira hoccunni diwa hasiissannonke. Qaaqquullu Arrishshote 30 xiqqeessi ale keeshsha dinonsa.
Qaaqquullu mageeshshi geeshshaati Arrisho iibbishira noonsahu?
Arrishshote caabbichi marqu qaaqquullinni hananfe jajjabbu manni geeshsha hasiissanno. Qaaqquullu uminsanni fulte Arrishshote caabbicho iibbishi`ra hanaffa geeshsha maate Arrishshote caabbicho afidhanno gede fushsha noonsa.
Arrishshote caabbicho afidhinokki qaaqquulli aana may qarri kalaqamanno?
Umihunni miqicho shaalanno; qoleno shokkanno; (Riikeeti). Duucha yannara shombu dhibbi woy (nimooniya) yinanni dhibbinni dhiwantanno. Hinko yanna agarte fula hoogate qarri xaadanno. Dhibba gargadhate dhuki ajanno. Woluno fayyimmate qarri hoodeesse daara dandaanno.
Hawado Arrishsho fula gibburo maa assinanni?
Gobbaydi kalqe baxxinohunni, Galchimi gobbuwa ikkado Arrishshote caabbicho afidhannokki daafira qaaqquullinsara ‘vaytaamine D’ yinanni shiilo (nixire) cophi assitanni uytanno; Ikkollana, konne ninke gobbara assa lowo gede ayirritanno; Ikkinohura, assa hasiissannonketi Arrishsho fultu yanna agarre shiima yannara ikkirono iibbisha hasiissanno. Ajanni ajeenna lamalate giddo shoole barra fushshiniro ikkanno. Wolu kayinni ‘Vaytaamine D’ afi`neemmoha ikkiro fayyimmate ogeeyye xa`matenni horoonsi`ra dandiinanni
Bakkalcho Ella 2/2014
