Gobbankera baxxinohunni Addis Ababu quchumira mannu lekka batidhanno yine hendanni doogga aana xiwamaanote baanere sutte, hattonni xiwamaancho kaameelu giddo worte xagisiranno saante huuccidhanna la”a haaro dikkitino. Tuqu xaadi aanano xagisi`nanni woxi ajinonkenna kaa`lenke yitanno borrono xaa yannara haammattanni daggino. Kuni baalu ikkinohu xisso kaajjitukkinni xagissanno uurrinshuwara hara hoogansanni ikkinota ammannanni. Dandiiniro xisso malaate leellisha hanaffukkinni buuxo assira dubushshanno. Batinye xissuwano harancho yanna giddonna boode fulonni calla hura dandiinanni.
Gobbankera xissamme xagisirantenni roore balaxo fayyimma agadhate aana illacha uyte loossanno xagisaano uurrinshuwa mereero “Redat Healthcare” kullanni. “Redat Healthcare” qara loosu gumulsiisaancho dukko Misgaana Selemooni; xissante xagisirate uurrinshansa martanno xagisiraanora xaginaatu owaante aate gobbaannino xisso balanxe gargadhate aana illacha uyte loossannota huwachishshanno. Konne irkisateno uurrinsha mannu xissotenni amadamate albaanni badatenni yannantenni xaginaate afidhanno gede assate kaa`litannota babbaxxitino buuxo assatenni xissonsa kaajjitukkinni shotu garinni fayyimmansa affanno gede loonsanni.
Gobbankera batinyu dagoomi xissamikkinni buuxira agurina xissamanno woyteno xissichu kaajja hoogironna gadacho ikka hoogiro xagissanno uurrinshuwa harate budi laafa ikkinota kayissannoti dukko Misgaana; balanxe buuxira meessi aana xisso woshshirate gede kiiramasi buuxirate jawaachishannokkita huwachishshanno. Lophitino gobbuwara kayinni Inshuraanse eate diru deerri fajjanno garinni babbaxxitino balaxote buuxo assa Inshuraansete kubbaaniyubbanni worroonni wodho ikkasi dagoomu buuxote budesi lossanno gede kaa`lino.
Muli yanna kawa gobbankerano hasi`nanni bikkinni ikka hoogirono fayyimma balanxe buuxirate ragaanni soorro noota kultino. Redat Healthcare konne bude lossatenna mannu xissamikkinni balaxe gargadha noosita ammantannohura babbaxxitino yannara babbaxxitino uurrinshuwa loosaasinera baatooshshiweelo buuxonna amaalete owaante aatenni umise qeecha fultanni afantanno.
Uurrinsha muli barrubba giddono Itophiyu pireesete uurrinsha loosaasinera baatooshshiweelo buuxonna amaalete owaante uytino. Itophiyu pireesete uurrinsha duuchu handaari hajubba kifile sooreette dukko Birihaane Selemooni IPU loosaasinete fayyimmara heddannohura “Redat Healthcare” ledo qinaawatenni uurrinshate loosaasinera baatooshshiweelo xagisate owaante injeessitinota buuxissino. IPU loosaasine uurrinshate loosu akati kaiminni uminsara hedde fayyimmate buuxo assidhanno akati ajinoha ikkasinni fayyimmate buuxo loosaasinenniwa abba hasiissinota buuxissino. Uurrinsha budu gede loosaasine noowa fayyimmate buuxo assidhanno gedenna fayyimmasi agaranno gede hende loonsanni hee`noonnitanna; konninnino mundeete xiiwo, sukkaare, kollestiroolete baatooshshiweelo buuxonna wolootta buuxo hasiissunte gede waaga ajishatenninna liqoote owaante uurrinshate geeshsha abbatenni uyno “Redat Healthcare”ra galata shiqishshino.
IPU loosaasine babbaxxitino attamote gumma barru baala fulansa ledo amadisiisame loosinsa basera fayyimmansa akata affanno harinsho haaro ikkitinokkita huwachishshannoti dukko Birihaane; 2016M.D baatooshshiweelo illetenna hinkote buuxo Alerti Hospitaale ledo qinaawatenni assinoonnita qaagiissitino. Konninni, illete baatooshshiweelo darre xagisate xaginaate uynoonni. Hinko wonshate, fushshatenna hayishshate owaante hasiissinonsa loosaasine afidhanno gede assinoonni. Konni albaanni unuunu kaansere lainohunni huwanyo uynanni yannara Payoneer diyagnostiiksi laabratoore ledo qinaawatenni baaxxa dandiitannokki honse meyaa loosaasinera baatooshshiweelo unuunu kaansere buuxonna /mammography/ altiraasawundete owaante uynoonni. Aanteteno uurrinsha loosaasinete hasatto kaima assatenni loosaasinete fayyimma agarate kaa`litanno loossa kaajjite suffannota huwachishshanno.
Loosu guutisaancho dukko Misgaana; Redat Healtcare balaxote buuxo aana dagoomu baqqeenya woyyeessate babbaxxitino yannara sukkaarete, mundeete xiiwonna kollestiroolete buuxubbanna amaalete owaantubba babbaxxitino uurrinsha loosaasinera baatooshshiweelo owaante uytinota egensiissino. IPU loosaasinerano baatooshshiweelo buuxo gobbaannino fayyimmate ogeeyyenni amaalete owaante aanna ledote buuxo heedhurono shiimu woxinni owaante aamamase uurrinshate loosaasine fayyimmansa agarate dandiissannonsa. IPU loosaasinete fayyimma agarate ka”ase uurrinshate illachi ledo harannoha ikkasinni hagiidhase xawisse aanteteno mitteenni loosate hasatto noonsata egensiissino.
Uurrinsha babbaxxitino yannara baatooshshiweelo uynanni owaantenna shiimu waagi owaante ledote mannu owaantete mitteege baaxxa hoogara dandaanno yaannohunni owaante umo afidhuhu gedensaanni leewu agani giddo baantanni amanyoote babbaxxitino uurrinshuwa ledo hasaawatenni owaante liqootenni shiqishshanni afantannota xawissino.
Redat Healthcare uynanni xagisatenna laabratoorete owaante ledote, 24 saate ambulaansete owaante, mini giddo xagisa, hattono 9477 bilbilu mereershinni xagissanno ogeeyyenni 24 saate teele meedisiine owaante aanno. Birru agani unuunu kaansere daafira huwanyo uynanni agana ikkasinnino unuunu kaansere /maamogirafe/ xagisaanote amaalete owante ledo agana wo`ma xibbuunni 50% waaga ajishatenni owaante aate aana afamanno.
Abbebech Maatewoos
Bakkalcho Birra 7, 2017 M.D
