Addis Ababa:- Tophiyu albillicho qaafanno gede assate ayii keeru doorshano Tophiya gatisannoha ikkiro qaraarannano adha hasiissannota Kalaa Kiristiyaan Taaddelehu xawisino.
Dagate Riqiwamaaano Amaale Mine mootummate Fulo Gashshooti qorqorshu hajubba uurrinshu komite gambisaanchi kalaa kiristiyaani Taaddelehu Tophiyu yannate hajo aana Pireesete ledo keeshsho assi yannara, Tophiya albillicho qaafisate daanni noo keerinna keeru doorshi xissankeranna qaraarara dandaanno.Tophiya gatisannoha ikkiro merannankeno ikko adha noonke yiino.
Tophiya albillicho qaafisate daannohu keeru doorshi meessi hasatto ikkiro diegemmamanno; xissankera dandaanno yiinohu Kalaa Kiristiyaani, qaraarirono Tophiya gatisannoha hattono daga albilicho saayannoha ikkiro adha noonke yiino.
Kalaa Kiristiyaani, “Tophiyu keere hasi`neemmo; keeru hoongi daga baalanta qarru aana tugino; Daganna dagoomu, gossoomitte, ama`notenni polotikunni mimmitu ledo giwamatenni daga baala caacceessinoho” yiino.
Konni garinni, ayii deerrano noori polotiku wolquwa insa amma`nonni Tophiya albillicho qaafisate yite ammantanno keeru hajubbanna mixote doorsha amadde shiqquro lantanno kaayyo noota qummeessino. Baalunku keeru mixo shiqishanno gede woshshatto assino.
Ayii garinni, keeru batirara hasi`neemmo; Tigirayete daga widoonni amadiise xawisinonte gede, Tigirayete daga Tophiyu, gobbate gede jawa base iillara uminsa qeecha fultino dagaati. Kuni qeechinsa albillicho qaafara hasi`neemmo. Insa qeechi Tophiya albillicho qaafisate assinanni sharro aana dawaro qolannoha ikkate injitanno doogo biddi assa hasiisanno. Injo hiitto assine, gumullanni; mayi garinni harunsa noo yaannohura hasaawanna amaalama hasiissanota coy`rino.
“Amaalete mini miila ikka`yanni Tigirayete daga daafirano sharrama nooe. Tigirayete dagano riqiweeti konne nommohu. Konne hee`ra Tophiyu daga ane gede la”ate. Tigirayeno keere afidhara hasireemmo. HWHTinni gawajjantino daga baxxinohunni Affaaretenna Amaaru qooxeessi hattono Tophiyu baalisi keere baraaranno gede halcho`yaati. Keeru daanno gede tenne hajo aana Amaalete Mini gede calla ikkikkinni qansootu gede baalunku hajo la`annosihu hasawanna amaalama noosi” yiino.
Tigirayete daga dhiwani baalunku ninke dhiwana ikka noosi. Konne ikka hoogiro, Tophiya banxeemmo yaa dandiinanikkita buuxise, tenne hajo aana polotiku hettisamaano baala huwata noonsa” yiino.
Kalaa Kiristiyaani, dagate riqiwamaano amaale mini miilla gede ikkikkinni, “Umi`ya hedooti” yee kaayse, Tophiyu hajo aana la`annonsati Tophiyu daga callaati yiino. Tophiya dihasi`neemmo yitanno biissa Tophiyu daafira hasaanbanni hasaawiranna amaale giddora karsinara dihasi`reemmo yiino. Korkaatuno, hajo Tophiyu daga callaate yiino.
Baxxinohunni, Cancishaanchu HWHT xawoho Tophiya diigate diimete giddorano e”eemmo yitanno massagaano noowa ikkinohura, “Shaanno xagicho loossannore, gatisanno xagicho loossanno manna assi`ne adha so`rote giddora eessannokki gede qoropha hasiissannonke” yiino.
Abrahaam Saamueel
Bakkalcho Onkoleessa 4 , 2014 M.D
