Addisi Ababa:- Itophiyu saiha honse agana daraarote laalcho gobbara soye 371 miliyone doolaare ale eo afi`rinota Giwirinnu Ministeere egensiissu.
Ministeerete Hortikaalcherete Investimentenna Ekisportete irko Dayirekterichi Kalaa Mokkonnini Salamoonnihu Itophiyu Pireessete uurrinshara xawissino garinni; Itophiyu saiha honse agana daraarote laalcho gobbara sokke 371 miliyoone doolaare ale afidhino.
Itophiyaho daraarote laalchi tenne yannara 56 gobbuwara hiramanni afamannota kule; Neezerlaande xibbuunni 76% ikkanno laalcho mereerima dikkora sokke, wole gattino Awuropu gobbuwara beekkanno. Saiha honse agana calla nafa 251 miliyoone doolaare fushshannohu daraarote laalchi mereerima dikkora shiqinota coyi`rino.
Hortikaalcherete handaarinni xaphomunni 200 kume ikkitanno Itophiyu gobba wedellira loosu kaayyo kalaqantinota xawisinohu Kalaa Mokkonnini; daraarote laalchinni calla loosu kaayyo kalaqate xibbuunni 80% qeechi noosita kulino.
Daraarote bocu boci handaari 18 diro kubbannokki dhagge noosikkita xawise; boode yanna giddo Itophiyu konni handaarinni jawa guma borreessiisse kalqetenni 4ki deerrinni daraaro sokkanno gobba ikkitno. Afirikaho Keeniyunni hoodisse 2ki deerri aana noota buuxisino.
Gobbate noo baatto hiikko dani kayishsho laashshate injitannota ikkitinota; danchu hodhishshu qineesso noota, xintu latishshi diriirinota, qajeela dandaannohu ikkadu wedelli noota hattono ontu dirinni kayse lamalu diri geeshsha giwireho qarrinsannikkihura kuni handaari gotti yaanno gede qeechasi fulino.
Daraarote laalchi latanni noohu 1600 heektaare ikkitanno gobbara ikkirono, Daraarote latishshi handaari gobbate woxu soorronni badhete miqicho ikkanni daynota qummi asse; qoqqowubbate nooti baattote shiqqo qarri tidhamiro, handaaru jawa gobbaydi woxu soorrora buicho ikkannoti xawoho yiino Dayrekterchu.
Mootimmano konni handaarinni gobbaydi investimente jawaachishate, poolise woyyeessate looso loonsoonnita qummi assino.
Abrahaam Saamueel
Bakkalcho Onkoleessa 4 , 2014 M.D
