Addis Ababa:- Ninke Itophiyu daga noo qarra sharramme qeelate hasaawa, irkisama, sumuu yaanna raganke taashshi’ne qaafa hasiissannonke yitinno IFDR pirezidaantitte Sahlewoqi Zewdeti.
IFDR pirezidaantittenna Itophiyu ejjeetto maamari aliidi agaraancho Sahleworq Zewdeti 81ki Itophiyu ejjeetto qeelle qaaggo ayyaana ayirrinsi yannara xawissino garinni; ‘’Ninke Itophiyu daga noonke qarra tidhate hasaawa, sumuu yaanna raganke taashshi’ne qaafa hasiissannonke. Keeru hala’linonna lattino Itophiya aantino ilamara ragisiisate qeechanke fula agarantannonke’’ yitino.
Danchummatenni qaagamate, oosonke saalfattannokkenkire, hedotenni yekkeerammeemmo woyte adha hoongummoro hedote deerrinni sharrama dandiinummoro gobbate keerinna lophora doorantanno doogo ikkase xawissino.
Amuwunna annuwu mundeenna miqqanni ayirrinyise agarameenna heedhino gobba reekkisa dandiineemmohu baalunkura qeechu noonke yine ammannummoro, xawadonna murci’raano ikkinummorooti yitino.
Dhagge wole handaarranni ledama noose yitinnoti pirezidaantitte Sahleworqi; baalunku bobbahino handaarinni bareende ledate sharrama noosi; ejjeetto rosiissinonkente gede qeelate bareendenna gobbate gede mittimmatenni uurranna irkisama hasiissannota amaaltanno.
Pirezidaantittete xawishshi garinni; qeellenke Itophiyaho tunsote giddo xawaabba hasi’ra, qarru giddo halamme loosa, yaaddote giddo hexxo assi’ra rosiissinonke; baxxinohunni xaa yannara afammeemmo akatira hasiissanno sinqeeti.
Adiwu bareedda qeelle ayyaani haaroo’manni sufannohonna sufo noo Itophiyu horora hisiisa hasiissanno. Bareedda Faashiste Xaaliyu horro giwatenni kakkalamatenni gobbate wolambinate agarsiissino; lowo ayirrinyino hasiisannonsa yitino.
Itophiyaho akkimale ola harinsoonnita kayissinoti Pirezidaantitte; diinu gobbaydinni einoha ikkikkinni Itophiyu ooso mimmitinsa ledo olantinotanna mimmito guddinota; konninnino haammata daga qaensanni darantinotano qaagiissitino.
Itophiyu ejjeetto bareedda maamari pirezidaantichi Lij Daanieel Jotte Mesfinihu isi widoonni; Itophiyu daga mitto ikkinoommohura hinaassinori, keerenna mittimma diigate millissannori, hiiqqitankera hasidhanno diinna no yee; daga mootimmate qotira uurratenni keere halashshate halamaano ikka hasiissannonsata coyi’rino.
Itophiya keeshshiishate jannootu diinu ledo olante baattino kakkalo qaaga hasiissannotano huwachishinno. Xaa yannara Xaaliyu ledo noo xaadooshshi miinjunni, dipiloomaasetenna wo’munku handaari halamanni mittoo’manni afamannota qummi assino.
Industretenni, irshunna miinjunni lophate assinanni sharro gufisate assinanni millimmo hee’rase qummi asse; tenne ikkito diigate mittimmatenni uurra hasiissannota Lij Daanieel Jotte coyi’rino.
Qiddist Gezaheny
Bakkalcho Onkoleessa 4 , 2014 M.D
