Addis Ababa;- Yirgaalamete qinaabbino giwirinnu industire paarke 130 ale ikkitannore qooxeessaho loosidhe galtinore beeqqaanonna horaameeyye assitanni afantannota Sidaamu qoqqowi industirete paarkuwa latishshi korporeeshine egensiissu.
Qoqqowu industirete paarkuwa latishshi korporeeshine qaru loosu gumulsiisaanchi kalaa Memmiru Mokehu Itophiyu Pireesete Uurrinshara xawisino garinni; qoqqowu industirete paarkuwa qarunni giwirinnu laalcho qineessatenni dikkote shiqishate illachishshe loossannoha ikkanna xaa yannarano xibbuunni 80% ale Yirgaalamete qinaawino giwirinnu industire paarkera laashshate loossa loonsanni hee’noonni.
Yirgaalamete industirete paarkera 11 sheede ijaarsinoonniri giddonni 10 sheede laashshaanote sayinse uynoonniha ikkanna 5 sheede loosu giddora e’inori giddonni 3 wo’mu dhukinni loossanni laalchonsa dikkote shiqishshanni afantanno yiino.
Kuri giddonni 1 gobbaydi dhaaddote investimente kubbaaniyya ikkanna layinkihu gobbate giddoha ikke Abukaadote zayte laashshannohanna sayikkihu kayinni gobbaydi investimente ikke adote laalcho laashshanni gobbate giddo dikkora shiqishshannotano xawinsoonni.
Gattinori lame sheede kayinni Abukaadote zayte qixxeessitanni kalqete dikkora shiqishshannoreeti.
Wolottuno bununna malawu laalcho laashshate wo’naalshu loosi giddora e’ino sheedooti heedhurono wo’mu dhukinni loossanni nookkita egensiisinohu loosu gumulsiisaanchi; kuri sheedooti agarranni garinni laashsha dandaate hasiissannonsata safote latishshuwanna maashinna wonshate harinsho aana nootano qummeessino.
Xaa geeshshano Abukaadotenni, malawunni, adotenna bunu laalcho qineessate loosi giddora e’inoha ikkanna woloottuno muli yanna giddo laalcho laashshate looso hanafate balaxote qixxaawonsa guddinore ikkansa kulino.
Industirete paarkehu qaru illachi laalchonsa gobbaydi dikkora soyaa ikkanna tayxe dirinnino Abukaadote laacho qineessitanni gobbaydi dikkora sokkinori lame kubbaaniyyuwanni calla 1.7 miliyoone Ameeriku doolaare eo abbatenni gobbate miinjira jawa qeecha fultanni noota egensiisino.
Tini industirete paarke amandoonnihu 2014M.Dnni geeshshano babbaxxitino loossa handaarranni 7000 ikkitanno qansootira loosu kaayyo kalanqoonniha ikkanna kuri giddonni 3000 ikkitannori uurrinshunni loosu kaayyo kalanqoonnisareeti yiino.
Yirgaalamete qinaabbinoti industire paarke qooxeessaho loosidhe galtinoriwiinni giwirinnu laalcho gamba assitanni qineessitanni dikkote shiqishshate loossannoha ikkanna; xaa yannarano 130 kumi ale ikkitannori loosidhe galtinori Abukaadote laalchonsa 23 maammarrannni, hattono 5000 ale ikkitannori kayinni adote lalchonsa 15 maamarra widoonni shiqishshanni eonsa lossidhanni horaameeyye ikkitanni noota xawisino.
Sidaamu industire paarkuwa latishshi korporeeshine hundaanni Yirgaalamete qinaabbino giwirinnu industire paarke hattono Alatta wondo, Shabbadiinonna Morochoho afantannore baadiyyete reekkote mereershuwa ikkitanna ledotennino gobbaydinni eessinanni laalcho riqiwannore laashshitanno interpirayzooti e’e laashshitannowa kilaasterete mereershuwa gashshitannotano loosu gumulsiisaanchi lede qummeessino.
Amsaalu Felleqe
Bakkalcho Onkoleessa 4 , 2014 M.D
