Addis Ababa:- Togooti mittimmanke xawissanno ayyaanna gobbanke xaa yannara afantanno injiinokki akatinni fultanno gede assate umise qeecha afidhinota Sidaamu qoqqowi pirezidaantichi kalaa Desti Ledamohu coyi’ri.
Pirezidaantichu tenne coyi’rinohu tayxeha Sidaamu daga haaru diru soorro Fichee Cambalaallate ayyaana Addis Ababaho ayirrinsi yannaraati.
Pirezidaantichu kalaa Desti Ledamohu assino hasaawinni; togooti mittimmanke xawissanno ayyaanna gobbanke xaa yannara afantanno injiinokki akatinni fultanno gede assate umise qeecha afidhinota qummi asse; dagatenna dagoomu mereero mittimmanna baxille kalaqate ragi raginkenni qeechanke fula noonke yiino.
Ledoteno haaru diri keerunniha, mittimmannihanna jireenyunniha ikkanno gede noosi halcho xawisino.
Addis Ababu quchumi kantiiwi ba’lattonni quchumu maazzagaaju mini loosu harisaanchi kalaa Xiraatu Beyyenehuno isi widoonni; Fichee Cambalaalla Itophiyu kalqete uyno Donna mereerinni mitte ikkase kayise; konne jawanna budillaancho dona amadosi garunni agarre aantino ilamara saysa hasiissannota coyi’rino.
Fichee Cambalaalla giddose amaddinoti mitte mittenti amado agarante ilamate sa’anno gede handaaru xiinxallaanonna mitte mittenti hajo la’annonsa bissa illacha tugge agaramannonsa qeecha fula hasiissannonsa yitinoti kayinni Pilaanetenna latishshu komishiine komishinere Dr Fitsum Asaffitite.
Hasaawa assitinno wosinnano diru keerunniha, latishshunnihanna mittimmanniha ikkanno gede halchonsa xawissino.
Tayxeha Fichee Cambalaallate ayyaana tenne lamalara Addis Ababaho Jaaloomu paarkera iibbadu amanyootinni ayirrinsoonniha ikkanna ayyaanu amanyooti aana ministirootu, Addis Ababu quchumi gashshooti luphiima loosu massagaano, Oromiyunna Sidaamu qoqqowi luphiima mootimmate loosu sooreeyye, amma’note massagaano, budu geerrinna wolootuno koyisantino wosinna afantino.
Qiddist Gezaheny
Bakkalcho Onkoleessa 4 , 2014 M.D
