Addis Ababa:- Fichee Cambalaallate ayyaaan Malga woradira sasu gudumaalira iibbadu garinni ayirrinsoonnita xawinsi.
Sa’u lame dirrara koroonu fayya korkaatinni Fichee Cambalaallate ayyaana gudumaaleho ayirrinsikkinni sa’noonniha ikkanna; konni dirira Sidaamu ayimma xawisanno garinni ayirrisate Malga woradi balaxote qixxaawo assanni keeshshinota Woradu woga turizimetenna ispoortete borro mini egensiisino.
Borrote mini sooreessi Kalaa Taaddese Taarikuhu baxxinohunni Bakkalcho gaazeexira xawisino garinni; Malga woradira sasu gudumaalira Maa`niicho, Wotarahonna Gugumaho haammatu manni fulinowa hala`lado yanna adhine bude xawisanno garinni qeexaalu amanyoote harisatenni alba annuwu ayirrissanni daggu doogonni seennu hore ga`nanna, labballu faaro kadanna hattono ooso hakko bikkinni godo`litanna ayirrinse sa`noonni.
Kalaa Taaddese xawisino garinni; Oromote daga hattono qoqqowu giddo afantanno Sidaamu daga babbaxxitino basenni dagge beeqqitinota coyi`rino.
Tayxehu Fichee Cambalaallate ayyaani amanyooti baxxino garinni ayirrisamino yiinohu kalaa Taaddese; ‘’Affini’’ amanyooti Sidaamu daga giddo baxxino garinni leellannohanna giddosino lowo hornya amadinoha ikkasinni qooxeessaho heedhanno mite mite qarrubbanna gibbo tirate yoo aanchimmate widoonni jawu qeechi noosi; Kuni amanyooti dagate aanno horo jawa ikkasenni badhera gate ba“annokki gedeno loonsanni hee`noommo yiino.
Amadisiiseno Fichee Cambalaallate ayyaani Sidaamu dagara jawa ayyaananna ayimma xawisannoha ikkasinni jajjabbu annuwi hundaanni dagganno ilamara loosi`rannihu mimmito ayirrisannihunna baxxillunnihu balchoomu baikkinni fichiinanni amanyoote tareessa hasiissannonsata qaagiissinohu borrote mini sooreessi kalaa Taaddese; ledoteno xaa ilamano konne ayyaana amadosi soorrantukkinni dagganno ilamara saysa hasiissannonsata lede huwachishino.
Abbebech Maatewoos
Bakkalcho Dotteessa 27, 2014 M.D
