Addis Ababa:- Umi deerri fayyimmate towaanyo owaante woyyaawa hasiissannota qummi assinoonni.
Umi deerri fayyimmate towaanyo owaante aate gara lainohunni Fayyimmate Ministeere Kalqete Fayyimmate Uurrinsha ledo halamatenni loonsoonnita xiinxallo xawo assini yannaraati xawinsoonnihu.
Xiinxallo umi deerri fayyimmate towaanyo amuraati aana noota kaajjadonna woyyaawa hasiissanno hajubba badatenninna albillicho illacha assine loosa hasiissanno hajubba qummi assate kaa`lannota xawinsoonni.
Xiinxallote illachi umi deerri fayyimmate owaante fayyimmate mereershira, fayyimmate keellira, dagoomu giddonna gamaho umi dirimi fayyimmate uurrinshara uynanniti dagooma mereersitino owaante womaashshu widoonni noo irko maa labbannoro, massagaanote widoonni noo illachino mageeshshaatiro, gumulo maa labbannoro hattono taalo horoonsi`rate xa`mo dawaro afidhanni noonso dino yitanno hedora dawaro aateeti.
Xinxallo kalqete deerrinni Tophiyu noo deerra hattono gobboomunna qoqqowubba noo deerra la”atenna albillicho loonsanni loossa gutunnita assate illachiinshoonnita anfoonni.
Xiinxallo umi deerri fayyimmate towaanyo amuraati aana womaashshuni, taalo horoonsi`ra hattono isilanchimmate widoonni amadame qarru noota caakkeessino.
Umi deerri fayyimmate towaanyo amuraati, womaashshu widoonni hasi`noonni deerrinni kaa`litannori irko assitanni nookkihura, taalo horoonsi`rate widoonnino saada ce’enna baatto loosidhe galtinori hattono xeertote heedhanno daga woy xintu latishshi iillinokki baycho uynanni owaante woffi yitinota leellishino. Isilanchimmate widoonni kalqe wortino safaraanchi garinni Itophiyu umi dirimi fayyimmate towaanyo owaante bocunni luphi yitinokkita xiinxallo leellishshino.
Battalate afaminohu Fayyimmate Ministeere Deetichi Dokter Derejje Dhugunihu, xiinxallo caakkeessitino qarra tirate albillicho Fayyimmate Ministeere kaa`litanno uurrinsha, qoqqowubbatenna yuniverstuwate ledo hasaawatenni umi dirimi fayyimmate towaanyo amuraate lossate mixo amande loonsannita qummi assino.
Umi deerri fayyimmate towaanyo amuraate woyyeessate 15 diri istiraatejikete mixo qixxeessa hasiissannota qummi asse, ontu dirinni xaphoomu mixonna mootimmate poolise ledo fiixoonsinanni sufisa hasiissannota xawisino.
Massagaano illacha hoospitaaletenna luphiima owaante uynannitera calla ikkikkinni xibbuunni 80 anga ikkanno dhibba balanxe gargadha dandiinannihura umi deerri fayyimmate towaanyo owaante amuraate woyyeessate aanano illachiinshe, kaa`litanno uurrinsha kaa`lono woyyaawa nooseta xawisino
Abrahaam Saamueel
Bakkalcho Dotteessa 27, 2014 M.D
