Addisi Ababa:- Tenne yanna ilama baxillenna shooshanqe bareedda annuwansanni rosse xaaddannonsa jifo mitimmatenni sa”a hasiissannota Itophiyu Bareedda Mitimma Pirezidaante Lij Daanieel Jottehu xawisino.
Itophiyu Beetemezaagibtete owaante sai barra Itophiyu qeellete barra korkaata assite bareedda annuwa assitino dhagge reqecco fannoonni.
Lij Daanieel Jottehu amuraatu aana saysino sokkanni xawisino garinni; bareedda annuwa mundeensa dunte keeshshiishshinota gobbanke Itophiya albillicho sufisate tenne yanna ilama bareende annuwatenni rosse jifo mittimmatennni sa”a hasiissannonsa yiino.
Pirezidaantichu xawishshi garinni, albi annuwanke bareendetenni mimmitoho shooshanqe assatenni hattono gamba yite baxillunni gobba agarte kakkalante Itophiya yinanni gobba ba”atenni gatisse jawa qeecha fultino.
lij Daanieel coyi’ranni, bareedda annuwa waaga baatte gobba albillicho sufissunte gede, tini ilamano annuwatenni mittimma rosse gobba dagganno ilamara saysa noonsa yiino.
Bareedda annuwa yawo ikkino Itophiyi, ba”annokki gede baalunku agara hasiissannota qummi assinohu Pirezidaantichu; Itophiya la`ino hajo aana qansootu gobbate mootimma ikkitinota xawise; gobba mootimmate calla facci assine tunge agura dihasiissanno yiino.
Itophiyu albillicho sufanno gede hasi`nummoro, macciishineemmo coye meemotenni meemissinanni macciishsha hasiissannonke yiinou Lij Daanieeli, gobbate keeru ikkanno gede baalunku dagoomi umisi qeecha fula noosi yee woxaratto assino.
Techo barra ayirrinsannihu 81ki qeellete ayyaani aana 50 diri gedenoonni umi yannara Gargaroshshu Olanto massagaano battalate leelte daraaro wortannoha ikkanna hattono babbaxxinohu baara widinni koyinsoonniri 47 wosini noowa ayirrinsannita Beettu Daanieel egensiisino.
Itophiyu Beetemezaagibtenna Maxaafu Mini Owaantehu Qaru Sooreessi Kalaa Yikuno Amilaakihuno isi widoonni; uurrinsha bareedda annuwate dhagge kulanno looso loossinohura jawu hagiirri macciishaminoe yiino.
Itophiyu Beetemezaagbitenna Maxaaffate Mini owaante reqecco fana, bareedda annuwa gobba suffanno gede assate baattino waagi mittimmatenni sa’nannikki qarri nokkita ilamate rosiisate illacha aasinoha ikkanna, be’ro barrinni kayse ga`a Dotteessa 28/2014M.D geeshsha sufannota xawisino.
Abrahaam Saamueel
Bakkalcho Dotteessa 27, 2014 M.D
