Hawaasa;- Sidaamu daga haaru diru soorro Fichee Cambalaallate ayyaani amadino hornyi garinni mittimmanna roduuwimmanke kaajjinshe sufisa noonke yaanni Sidaamu qoqqowi pirezidaantichi kalaa Desta Ledamohu xawisi.
Fichee Cambalaallate ayyaaniha ha’nura woganke garunni agarooshshe assine aantanno ilamara ragisiisa hasiissannotano pirezidaantichu sooreessu gudumaalira ayyaanu amanyooti aana assino hasaawinni huwachishino.
Fichee Cambalaalla kalqete dagata konni dirinni iibbino garinni ayirrisate hawalle iillishi’ne yee; Cambalaalla Sidaamaho haaro diru soorrooti; sainoha agurre; dhibbinotano hambe; haaroo’mine haaro diro; haaro heeshsho; haaro hexxonna hagiirru yannaati yiino.
Sidaamu daga konni albaanni sa’u lame dirrara Koroonunna woloottu korkaattano kalaqqino hekkonni fulte togoonni ayyaanansa ayirrisa didandiitinonkanni. Xa kayinni Kaaliiqino fajjeenna; Sidaamu dagano sharronsanna halchonsa wo’miteenna qoqqowo ikkite konni garinni hagiirrensa xawisa dandiitino yiino pirezidaantichu.
Fichee Cambalaallate amaddino sirnyi mittimmate, kaa’lamanna halamate, buxima mittimmatenni halamme hunate; afi’noonniha beeqqine itate; danchummanna keeraate halashshate yiino.
Hakko garinnino albaanni assinoommo sharro guma laaltino; poletiku xa’monkeno higgino. Ikkollana loosi’ne lophatenna buxima hunatenni heeshsho woyyeessate albillicho jawu mini loosi garannonke yaanniiti coyi’rinohu.
Konni gedensaanni daganke xa’mo ikka hasiissannoti buxima qeelte bulduuda heeshsho hee’rate; buxima qeellannihu kayinni daafurre danfe loonseeti. Konnirano dagate heeshsho woyyaabbanno gede baalinke albanke latishshu widira qola hasiissanno yee; mootimmano hasiissanno injoo baala kalaqate hixamanyite loossanni afantannotano qummeessino.
Amadisiiseno haaru diri halchonke wo’mitannoha; gobbanke mittimma kaajjitannoha; roorenkanni ayirrineemmoha; qeellenniha, hagiirru, gaarunna gaacheenu diro ikkonke yaanni ayyaana ayirrissannori baalanko dancha halchosi xawisino.
Amsaalu Felleqe
Bakkalcho Dotteessa 27, 2014 M.D
