-Amaalete mini 6ki doycho, 1ki loosu yanna, 2ki uurrinshu songo harisino
Hawaasa: Sidaamu Dagoomu Qoqqowi Amaale Mini 6ki doycho, 1ki loosu yanna, 2ki uurrinshu songo bero qoqqowu Hawaasi quchumira harisino.
Songote fanote hasaawa assitinoti Sidaamu Qoqqowi Amaale Mini Qara Songaafitte Dukko Faantaye Kebbedeti, Sidaamu Daga umose umisenni gashshi’rate xa’mo dawaro afidheenna qoqqowunni tantanammi kawa sai dirira kalqete deerrinni kalaqantino koroonu fayya korkaati gudumaaleho ayirrunsummokki sa’nummo gedensaanni tayxe diro ayirrinsoommo Sidaamu Daga diru soorro Fichee Cambalaallate ayyaanira hawalle iillishi’ne yite; kuni ayyaanino iibbillunni ayirranno gede amaalete mini fulino qeechira galatase shiqishshino.
Amaalete mini uurrinshu songo hanafara balaxe amaalete mini haaro ikkasi kaiminni amaalete mini miillara assootunna galtinote wodho aana qajeelsha uynoonniha ikkanna; amaalete mini miillano konni qajeelshinni ikkado huwanyo afidhino yine ammaneemmo yitino baabba Faantaye.
Dagate riqiwo shota ikkitinokkita huwachishshinoti Aayirrado Dukko Faantaye, amaalete mini miilla qajeelshunni afidhino egennonninna Honsu agani loosu gumulshi riippoorte kaiminni qarqarinsara loosantanno loossa garunni harunsatenni jawaate loosannoha jawaachishatenninna jawaattannokkire qorqoratenni doortinonsa daga owaata noonsa gede kaajjishshe coyidhino.
Sidaamu Qoqqowi Pirezidaantichi Aayirradu Kalaa Desta Ledamohu isi widoonni, Sidaamu Qoqqowi babbaxxino qarqarira kalaqantino moollenna addi addi qarrubbara leellishshino halamme tittirshunni xawise; konni gobbaannino gobbanke golantinose duuchu handaari jifora sa”ate assinanni gaarira qeechasi fulanni afamanno yiino.
Amaalete mini qoqqowu loosu gumulsiisaano bissa Honsu agani loosu gumulshi shiqeenna hasaawa assinoonni. Konni kaiminni shiqqino riippoorte aana amaalete mini miillanni addi addi xa’mubba shiqqeenna pirezidaantichunni dawaronna xawishsha uynoonni. Honsu agani loosu gumulshinni Doogote latishshi handaarinni woyyaawino loosi loosaminota kulloonni.
Sidaamu Qoqqowi Amaale Mini techo songosinni 2014 M.D ledote baajeette aana hasaawihu gedensaanni, 874 miliyoone birra /Sette Xibbenna Lamalayna Shoole miliyoone/ Birra asse kaajjishino.
Addisu Adoola
Bakkalcho Dotteessa 27, 2014 M.D
