Hawaasa:- Fichee Cambalaallate ayyaani umisi keere lallawannoha ikkasinni;ga`labbote qarrinna mitiimma xaaddukkinni ayirrisate qixxaawo assinoonnita Hawaasi Quchumi Gashshooti Poolisete Bidddishshi Xawisino.
Biddishshu Sooreessi Komaander Derrese Bussaarohu Pireesete uurrinhsara xawisinonte gede, Dotteessa 20na 21ni ayirrinsanni Fichee Cambalaallate ayyaanira addi illacha tunge mitiimma nookkiha ayirrisatenna jeefisate Hawaasi quchumi Poolisete biddishshi Keerunna Ga`labbote hattono qoqqowu Poolisete komishiinenni ledo halamatenni mixo fushshine qixxaawo assinoonnita egensiisino.
Fichee Cambalaallate ayyaani Sidaamu diru soorro ayyaana nafa ikkiro, gobboomunna kalqete dona ikkino daafira Hawaasi quchumira xaa yannara nooti ga`labbote ikkito faasiku ayyaana sufeno Fichee Cambalaallate hattono isiliminnu ama`no Ramadaanu ayyaana kaima assatenni mitiima kalaqantannokki gede haammata looso loonsoonnita Komaanderchu xawisino.
Sidaamunnihu diru soorro ayyaani umisiha budenna balchooma afi`rino ayyana ikkanna; giddo noohano ikko wolewiinni dagganno wosinna dawooe bushshu yee hanqafe amadinoha ikkinohura, konne dancha bude seekkinenna kaajinshe sufisate xaano jawaante loonsanni hee`noommo yiino.
Fichee Cambalaallate ayyaana ayirrinsanni yannara hunote wolqa konne dancha budenna balchooma booraarsate milli yitannori duuchu jaddasinu noohura, konne fille seeru hundaanni assate dooramino baycho bande hakko qooxeessira xaanni looso hananfoonni yiino.
Tenne lamalara assinoonni filonni oppereeshinenni addi addi baaycho jaddote loosira bobbakke anganni butte adhitanori, xexxerisa moortannorinna woloota hunote loosaasine 60 aleenni ikkitannore iilline seeru hundaanni qolle qorqorsha assinanni hee`noonni. Kuri jaddote loosira bobbakinori mooranna butte adhate aleenni nookki dudduwo fincatenni daga ge`annokki gede hoteellatenna addi addi agattote mine maaxante huno loossannore ikkitinota komanderichu qummi assino.
Konne looso loosate amandoonni mixo gummaame ikkitanno gede dagate ledo halamme loosate ikkinota kulinohu Komaanderichu Derresse; xaa geeshsha daga assitino loosinna irko jawate. Hawaasi daga keerehonna ga`labbote nooseti murci`ra kaajodo ikkitinohura keeru co`ichimma agadhate daga umise roonda wodhite qooxeessase towaxitanno gede assinoonni yiino.
Sidaamu dagahu diru soorro Fichee Cambalaallate ayyaani kalqete dona ikkanna, addi addi gobboomunna qoqqowubbate deerrinni ayirraddu wosini Hawaasi quchimira bobbakkannohura, xaa yannara quchumu co`ichanna ga`labbosi agarantinoha ikkinota Komaanderchu buuxisino.
Komanderichu xawishshi garinni, tenne yannara quchumu giddo noo daga millimillo co`itte ikkasenni, dada`laahu, loosirannohu rosannohu hattono dikkirannohu barru loososi loosi`ranni nootano ledatenni.
Quchumu giddo addi addi yannara ayirrinsanni ayyaanna kaima assite doogimale dagate woxe horritaranna hogoofidhara hasidhannori honqooqeeyye daddallano korkaatiweello uduunnu aana waaga leddannokki gede harunso assatenni qorqorsha kaajjinshe sufinsoonnita Komaanderchu buuxisino.
Fihee Cambalaallate ayyaani giwammoha araarsate hattono saadateno addi illacha assine ayirrinsanni ayyaana ikkanna, konne Sidaamu daga balchoominna hornyi sum`a hunate milli yitanno daga harunsine qoricha adhate waaxamme loonsanni hee`noonnitano kulino.
Fichee Cambalaallate ayyaana mitte mitiimma nookkiha jeefisatenna gufissannor hee`riro rahotenni tirate umihunni ga`labbote bissa qixxaabbe noohura kalqamanno qarri hee`rannokkitanna kalaqamirono wiinamunni qaafo adhine dagate keerenna ga`labbo agarate qophaanbe hee`noonita xawisino. Konnira dagano albaanni assitanni dagginonte gede mitte mitiimma kalaqantanno yannara ga`labbote bissara rahotenni egensiisatenni albinni roore mootummate ledo halante mitto ikkite loosanno gede woshshatto assino.
Abrahaam Saamueel
Bakkalcho Dotteessa 20, 2014 M.D Hamuse 2
