Hawaasa;- Sidaamu daga haaru diru soorro Fichee Cambalaallate ayyaani Sidaamunniha calla ikkikkinni baalinkeha ikkasinni mittimmatenni iibbino garinni ayirrisate qixxaabbinota mitu mitu Hawaasi quchumi teessaano coyidhu.
Ayyaanu baxillunniha, keerunniha, mittimmanniha ikkasinnino quchumu dagoomi albinni roore gutunni ayirrissannotano teessaano hedonsa baxxinohunni Itophiyu Pireesete uurrinshara uytino.
Quchumaho towaanyo assine hedonsa xa’minoommori mereerinni quchumu teessaanchonna Hawaasi yuniversitera rosaanote pirezidaanticha ikkinohu wedellichu Zelleqe Gemmechuhu coyi’ranni; tayxeeha Sidaamu daga haaru diru soorro Fichee Cambalaallate ayyaana quchumaho albinni baxxino garinni ayirrisate qixxaawino.
Ayyaanu Sidaamu dagaha calla ikkikkinni kalqenniha ikkasinnino baalanti daga, dagoominna manni quchuminkera mittimmatenni ayirrinseemmo yiino.
Itophiyu daga hagiirrehono, olahono, dadillehono mittimmatenni halammeemmore ikkankenni konne ayirrado ayyaanano baalinke uminkeha assi’ne annimmatenni ayirrisa hasiissannonkehura balaxote qixxaawo assinoommo yaanniiti kulinonkehu.
Wolenti quchumu teessaancho baabba Ijjigaayyehu Bellexetino uytinonke hedonni; sa’u sase dirra babbaxxino korkaatinni garunni gudumaaleho ayirrisamikkinni keeshshinoha Fichee Cambalaallate ayyaana tayxe danchu garinni gudumaalehono ikko mine minenke ayirrisate qixxaawo assinoommo yitino.
Ayyaanu manchi beettira calla ikkikkinni saadatenna kalaqamahono jawa ayirrinyenna qoropho assinanniho yitinoti baabba Ijjigaayyehu; manchi beettiranna kalaqama baalanko noosi ayirrinyi kaiminnino Kalqete dona ikke borreessamino yitino.
Quchumu teessaano, baxcinohunnino meentu ayyaana garunninna iibbino amanyootinni ayirtisate dandiissiisannore baala hagiirrunni qixxeessinanni dangoommo yite; barrahono fiixu firunna qachu manni baalu baxillunni ayirrinse hosate quqquxamme agadhine hee’noommo yitino.
Ayyaanu sa’u muli dirrara albaanni danchu garinni ayirrisamanni dayrono kalqenkera kalaqaminohu koroonu fayya korkaatinninna ga’labbote booraambe korkaatinni qiidaware keeshshinotanna tayxe kayinni danchu garinni ayirrisate qixxaawinota coyi’rinohu kayinni quchumu teessaanchi Dirreesso Waaqayyoho.
Dirreesso amadisiiseno, ayyaanu iibbino garinni ayirrisamanno gede quchumaho ikko qooxeessu wedellinna dagoomi qooxeessu keerinna ga’labbo agarantanno gede uminke qeecha fulleemmo yino.
Tayxehu Sidaamu daga haaru diru soorro Fichee Cambalaallate ayyaani bi’re birqiiqinni hanaffe akaakkanna annuwinke amaddenna ayirrisse xaa ilamara iqqitinoha ikkasinni xaa ilamano ayyaanu balchooma garunni egentenna awuutte bowirsa agarantannonasata qaagiissino.
Ayyaana ayirrisate quqquxamanni agadhe keeshshinota kulinokehu kayinni wolunku quchumu teessaanchinna Hawaasi yuniversitera layinki digire rosaancho ikkinohu wedellichu Tiito Tuneho.
Albi annuwi garunni amadde abbitinoha naaxxisanno budenna balchooma afi’rinohu Fichee Cambalaallate ayyaani kalqete dona ikke borreessame ayirtisama dandaasinnino lowonta hagiirraamo ikkinota coyi’rino.
Xaa ilamano konne gobbankenni sae kalqete dacha lawishshanna duucha hornyubba afi’rino ayyaana iqqitinonkere albi annuwa ayirrisa hasiissanno yinohu Tiito; xaa ilama annuwankenna amuwanke ayirrisatenninna macciishshatenni lowo egenno adhanna ayimmankr seekkine afatenni sa’ne kalqenkera egennaikkanno balchoomanke latisi’ra noonke yaanniti kulinonkehu.
Tayxeha Fichee Cambalaallate ayyaana duuchinke mittimmatenni, baxillunninna ayirrisamatenni woloottahono dancha lawishsha ikkino garinni ayirtinseemmo yitinori quchumu teessaano; baalanka ayyaana ayirrissanno dagoomirano hawalle keerunni iillishi’ne yitanni dacha halchonsa xawissino.
AMSAALU FELLEQE
Bakkalcho Dotteessa 20, 2014 M.D Hamuse 2
