Sidaamu dagoomu qoqqowi mootimma Poolisete komishiine qixxeessitinoha qoqqowu addi wolqanna poolisete miillara ba’latto aatenna kakkayishu afamisha aate amanyoote harisino
Amanyootu aana leelle ba’latto uynohu qoqqowu pirezidaantichi kalaa Desta Ledamohu coyi’ranni; deerru lopho ba’latto afidhinoonnihura hawalle tashshi yii’ne yee; Itophiyu gobba’ne hasidhanno’ne yanna baalantera qoqqowo riqibbine Benishaangulete qoqqowi geeshsha ha’ratenni bareendetenni dhagge loossine higginoonniri addi wolqa miilla hawalle keerunni higgine daggini yiino.
Pirezidaantichu amadisiiseno, qoqqowunni sa’ine gobbate agarranni’ne qeecha fultinoonnihura aye woyteno bareeddankeeti yee; addi wolqa
hiittenne yannarano danchu amanyooti noo’nere ikkatenni manchi beetti baala taalu garinni owaata noo’ne yaanni sokkasi saysino.
Qoqqowu Polisete komishiine komishinerichi Tesfaye Tungamohu yiino garinni; akkalu qoqqowi giddo hee’neenna xa’mante dawaro afidhukkinni keeshshitino ba’lattotenna addi addi horo xa’mo Sidaamu qoqqowi rahotenni macciishshe dawarinota qummeesse; gadachote loosi aana heedhe kakkalantu ddi wolqa maate jawaachishatenna gadachote aana keeshshite higgu addi wolqara deerru lophonna ba’latto uyinoonnita xawisino.
Ledoteno komishiinerichu, techo uynoonni ba’latto,umi yannara kaa’laachimmate komishinerimma ikkasenna addi addi deerru lopho ikkase xawise; kunino loosu aana noore jawaachishannoha ikkasi buuxisino.
Qoqqowu keerunna ga’labbote biiro sooreessi kalaa Alemaayehu Ximootiwoosihuno isi widoonni; addi wolqaranna Polisete miillar deerru lopho ba’latto aate amanyooti Sidaamu qoqqowo ikke tantanami kawa handaarunni gumaamma loossa gumullanni keeshshinoonnita kule; deerru lopho ba’lattonna afansha aate amanyooti beeqqaano ga’labbote bissa hawalle tashshi yino’ne yiino.
YAAREED GEETAACHEW
Bakkalcho Dotteessa 20, 2014 M.D Hamuse 2
