Addis Abeba:- Fichee cambalaalla gobbate keere, mittimmanna baxille kaajjishate noose balchooma agarre baxxino garinni ayirrinsannita Sidaamu qoqqowi amaale mini songaafitte Baabba Faantaye Kebbedeti egensiissu.
Sidaamu daga diru soorro fichee cambalaallate ayyaana lainohunni qara songaafitte baabba Fantaye Kebbedeti hawalle iillishi’ne yitanno sokka sayissino. Sokkasenni fichee cambalaallate ayyaana kalaqaanchu kaa’looshshinni haaru dirrara sa’anno qansooti mittimmatenni kalaqaanchonsa galaxxitannoha galatunna mittimmate ayyaana ikkasi qummi assitinno.
Ayyaana ayirrinsanni woyte mannunna saadatenni, murotenni kalaqamu geeshsha luphiima qoropho assinanni amanyoote ikkasi kayissanno. Annuwu qeexaalunni, meentunna seennu horetenna wedellunna ooso faaro kaddanni ayirrissanno ayyaana ikkasi qummi assitinno. Konninnino albillicho mittimma agarte ayirrissanni hadhanno gede assanno ayyaana ikkasino qummeessitino.
Qara songaafitte xawissanni; ayyaanu Sidaamu daganna wolootuno xawo fulte mittimmatenni mimmito guwissanninna kalaqaancho galaxxitanni ayirrissannoho.
Sa’u lame dirrara koroonu fayya korkaatinni ayirrisamikkinni sainota kayissinoti dukko Faantaye; xa kayinni kuni qarri shotasinni xawoho fulle ayirrisate qixxaawo gumulloonnita xawissino.
Fichee cambalaalla gobbate keerenna mittimma hattono baxille kaajjishate noose balchooma agarino garinni ayirrinsannita egensiissino. Giwaminohu araaramannoha, koma agurrannihanna ga’ a hexxonna keere kaajjishannoha gutu ayyaana ikkasi coyidhino.
Mittu mittunku qansichi ayyaanu keerunni ayirrisamanno gede qooxeessasi agadhanno gede ledde huwachishshe; baxxinohunni qansootu mereero baxillunna mittimma hattono loosu kakkaoooshshinna gobboomu sumimme Gotti yite leeltanno ayyaana ikkanno gede dancha halchose xawissino.
AMSALU FELLEQE
Bakkalcho Dotteessa 20, 2014 M.D Hamuse 2
